काय झाले, विश्वविजेतेपद जिंकल्यावर शेफालीला अश्रू रोखता आले नाही, पाहा Video
चॅम्पियन बनल्यानंतर भारतीय संघाची कर्णधार शेफाली वर्मा खूपच भावूक झाली. विजेतेपद घेताना शेफाली वर्मा काही वेळ रडत राहिली.
भारताच्या महिला संघाने इंग्लंडला 7 विकेटने (India vs England ) हरवून अंडर 19 विश्वचषकाचे विजेतेपद (Women Under-19 World Cup)पटकवले. भारतीय गोलंदाजांसमोर इंग्लंडची टीम ढेपाळली. भारताला विजयासाठी हव्या असणाऱ्या 69 धावा 36 चेंडू शिल्लक असतानाच पूर्ण झाल्या.भारतीय महिला संघाने केलेल्या या भीमपराक्रमामुळे सर्व देशभर आनंदोत्सव साजरा होत आहे. त्याच वेळी संघाची कर्णधार शेफाली वर्माचा (Shefali Verma)एक व्हिडिओ चांगलाच व्हायरल होत आहे. या व्हिडिओत शेफालीला अश्रू रोखणे कठीण झाले होते.
Happy tears for Shafali Verma, India U19 Captain
First World Cup for Indian women’s cricket. Ever.
Future is bright! pic.twitter.com/ocOdo7neK0
— Madhu Pai, MD, PhD (@paimadhu) January 29, 2023
चॅम्पियन बनल्यानंतर भारतीय संघाची कर्णधार शेफाली वर्मा खूपच भावूक झाली. विजेतेपद घेताना शेफाली वर्मा काही वेळ रडत राहिली. हा भावनिक व्हिडिओ सोशल मीडियावर व्हायरल होतोय. शेफाली वर्माने एक दिवस आधी तिचा वाढदिवस साजरा केला होता, त्यामुळे विश्वचषक विजयाने तिचा वाढदिवस अधिक खास झाला.
भारताच्या ज्युनियर किंवा सीनियर महिला संघाने यापूर्वी कधीही विश्वचषक जिंकला नव्हता. 2005 आणि 2017 च्या महिला क्रिकेट विश्वचषकाच्या अंतिम फेरीत भारताच्या वरिष्ठ संघाला पराभवाचा सामना करावा लागला होता. त्याचवेळी 2020 महिला टी-20 विश्वचषक फायनलमध्ये भारताला ऑस्ट्रेलियाविरुद्ध पराभवाचा सामना करावा लागला होता. रिचा घोष आणि शेफाली वर्मा देखील त्या T20 संघाचा भाग होत्या.
बीसीसीआयचे आभार
शेफाली वर्माने विश्वचषक विजेतेपदावर सांगितले की, ‘सर्व मुली ज्या प्रकारे परफॉर्म करत आहेत आणि एकमेकांना सपोर्ट करत आहेत त्यामुळे मी खूप आनंदी आहे. आमचा सपोर्ट स्टाफ , आम्हाला पाठिंबा देत सांगत होता की आम्ही चषक जिंकण्यासाठी येथे आला आहोत.या सर्वांचे आभार. खेळाडूंनी मला खूप साथ दिली. तसेच मला हा संघ दिल्याबद्दल बीसीसीआयचे आभार.
श्वेताचे केले कौतूक
श्वेता सेहरावतचे कौतुक करताना शेफाली म्हणाली, ‘श्वेता सेहरावत उत्कृष्ट खेळाडू आहे आणि तिने सर्व गेम प्लॅन फॉलो केले. केवळ तिच नाही, तर अर्चना, सौम्या व इतरांनी शानदार खेळ केला. सर्व काही अविश्वसनीय आहेत. आता भारतीय वरिष्ठ संघ टी-२० विश्वचषक जिंकेल, असे शेफाली म्हणाली.
तीन वर्षांपुर्वी पराभव
तीन वर्षांपूर्वी वर्ल्ड कप फायनलमध्ये टीम इंडियाचा पराभव झाला होता. शेफाली वर्मा त्या टीमचा भाग होती. मेलबर्न क्रिकेट ग्राऊंडच्या मैदानात 2020 महिला टी 20 वर्ल्ड कपचा फायनल सामना झाला. ऑस्ट्रेलियाने 185 धावांचे लक्ष्य दिले होते. या लक्ष्याचा पाठलाग करताना टीम इंडियाचा डाव 99 धावात आटोपला होता. आता 2023 मध्ये पोचेफस्ट्रूम येथे वर्ल्ड कप विजयाने मनात असलेली ती सल भरुन निघाली. या प्रसंगी शेफाली वर्माच्या डोळ्यात आनंदश्रू तरळले. भारतीय महिला क्रिकेटने वास्तवात एक मोठा टप्पा गाठलाय.
