SL vs ENG: दुसऱ्या टी20 सामन्यात इंग्लंडचा श्रीलंकेला दणका, मालिका 2-0 ने जिंकली
श्रीलंका आणि इंग्लंड यांच्यात तीन सामन्यांची टी20 मालिका सुरू आहे. या मालिकेतील दुसर्या सामन्यात इंग्लंडने बाजी मारली आणि मालिका खिशात घातली. खरं तर दुसऱ्या डावात 17 षटकांचा खेळ झाला आणि 168 धावांचे टार्गेट दिलं गेलं.
श्रीलंकेविरुद्धच्या टी20 मालिकेतील दुसऱ्या सामन्यात इंग्लंडने नाणेफेक जिंकली आणि प्रथम गोलंदाजी स्वीकारली. श्रीलंकेने प्रथम फलंदाजी करताना 20 षटकात 5 गडी गमवून 189 धावा केल्या. या धावांचा पाठलाग करताना इंग्लंडला फक्त 7.2 षटकांचा खेळ झाला आणि थांबला. कारण पावसाने हजेरी लावल्याने सामन्यात खंड पडला. तेव्हा इंग्लंडने 7.2 षटकात 2 गडी गमवून 57 धावा केल्या होत्या. जर यावेळी पाऊस थांबला नसता आणि निकाल लागला असता तर श्रीलंकेचा विजय झाला असता. कारण डकवर्थ लुईस नियमानुसार इंग्लंडच्या 69 धावा असण्याची गरज होती. पण त्यांच्या 57 धावा असल्याने 12 धावांनी मागे होते. त्यामुळे श्रीलंकेला विजय मिळला असता. त्यानंतर पाऊस थांबला आणि सामन्याला पुन्हा सुरूवात झाली. पण यावेळी षटकं कमी करण्याचा निर्णय घेतला. तसेच नवं टार्गेट दिलं गेलं. 17 षटकात 168 धावांंचं टार्गेट दिलं गेलं. 16.4 षटकात दिलेलं आव्हान 4 गडी गमवून पूर्ण केलं.
श्रीलंकेकडून टी20 कर्णधार दासुन शनाका वगळता सर्वांना धावांमध्ये योगदान दिलं. दासुन 6 चेंडूत फक्त 1 धाव करून बाद झाला. पाथुम निसंका आणि कमिल मिशारा यांनी चांगली सुरूवात केली. या जोडीने पहिल्या विकेटसाठी 56 धावांची भागीदारी केली. पाथुम निसंका 22 चेंडूत 34 धावा करून बाद झाला. त्याने 3 चौकार आणि 2 षटकार मारले. त्यानंतर कमिल आणि कुसल मेंडिसची जोडी जमली. या जोडीने अर्धशतकी भागीदारी केली. कमिल 36 धावा करून बाद झाला. त्याने 2 चौकार आणि 2 षटकार मारले. कुसल मेंडिस 17 चेंडूत 32 धावा, पवन रत्ननायकेने 22 चेंडूत 40 धावा केल्या. तर चरिथ असलंका नाबाद 28 आणि जनिथ लियांगे नाबाद 1 धावांवर राहिले. इंग्लंडकडून जोफ्रा आर्चरने 2, विल जॅक्स 1, लियाम लिव्हिंगस्टोन 1 आणि अदिल राशीदने 1 विकेट काढली.
इंग्लंडला विजयी धावांचा पाठलाग करताना 10 धावांवर पहिला धक्का बसला. फिलिप सॉल्ट 1 धाव करून तंबूत परतला. त्यानंतर संघाच्या 38 धावा असताना जेकॉम बेथेल 13 धावा करून बाद झाला. जोस बटलरने 39 धावांची खेळी केली. तर हॅरी ब्रूकने 12 चेंडूत 4 षटकार आणि 2 चौकार मारत 36 धावा केल्या. त्याच्या या खेळीमुळे धावा आणि चेंडूमधील अंतर कमी झालं. तसेच विजयाची स्क्रिप्ट लिहिली गेली. टॉ़म बँटनने खेळ पुढे नेला आणि आक्रमक फटकेबाजी केली. बँटनने 29 चेंडूत अर्धशतक पूर्ण केलं.
