सौरव गांगुलीचा मोबाईल घरातून गेला चोरीला, आता सतावत आहे अशी भीती

मुंबई : बीसीसीआयचे माजी अध्यक्ष आणि माजी कर्णधार यांच्या घरातून लाखो रुपये किमतीचा फोन चोरीला गेला आहे. कोलकात्यामधील बेहला येथील घरात चोरी झाली आहे. संबंधित प्रकार पोलिसात तक्रार दाखल झाल्यानंतर उघडकीस आला आहे. गांगुलीने शनिवारी ठाकुरपूर पोलीस ठाण्यात तक्रार दाखल केली आहे. सौरव गांगुलीला आता फोनपेक्षा मोबाईलमधून खासगी डाटा लीक होण्याची भीती सतावत आहे. तसेच या डेटाचा गैरवापर होण्याची भीती व्यक्त केली आहे. जेव्हा चोरीची घटना घडली तेव्हा गांगुली घरात नव्हता. पण त्यांना जेव्हा फोन घरी विसरल्याचं कळलं तेव्हा त्यांनी शोधाशोध सुरु केली. पण फोन काही हाती लागला नाही. त्यानंतर बरीच विचारपूस केल्यानंतरही सुगावा न लागल्याने अखेर पोलीस स्टेशनची पायरी चढावी लागली. आता पोलीस तपास सुरु असून लवकरच मोबाईल मिळेल अशी अपेक्षा आहे.

सौरव गांगुली याच्या घरी पेंटिंगचं काम सुरु आहे. त्यामुळे पोलिसांची संशयाची सूई आसपास फिरत आहे. तसेच या व्यतिरिक्त घरात कोण आलं आणि गेलं यासाठी सीसीटीव्ही तपासला जात आहे. गांगुलीने शनिवारी ठाकुरपूर पोलीस ठाण्यात पत्र लिहून घरातून मोबाईल चोरीला गेल्याचं सांगितलं आहे. सकाळी 11.30 वाजता शेवटा फोन पाहिला होता. त्यानंतर फोन सापडलेला नाही.

मोबाईल चोरीला जाण्यापेक्षा त्यातील डेटा लीक होण्याची भीती गांगुलीला सतावत आहे. कारण बँकेचे एक्सेस आणि महत्त्वाची माहिती त्यात आहे. हाच मोबाईल नंबर बँक अकाउंटशी लिंक आहे. तसेच दिग्गज व्यक्तींचे मोबाईल नंबर यात सेव्ह आहेत.मोबाईल शोधण्यासोबत डेटा लीक होऊ नये याची भीती सौरव गांगुलीच्या मनात घर करून बसली आहे. माहितीनुसार गांगुलीचा फोन चोरी झाला त्याची किंमत 1 लाख 60 हजार रुपये आहे.

सौरव गांगुली दिल्ली कॅपिटल्स फ्रेंचायसीमध्ये क्रिकेट डायरेक्टर आहे. सौरव गांगुलीच्या नेतृत्वात टीम इंडियाने वनडे वर्ल्डकप स्पर्धा 2003 च्या अंतिम फेरीत स्थान मिळवलं होतं. पण ऑस्ट्रेलियाकडून पराभवाचं तोंड पाहावं लागलं होतं. दुसरीकडे, अंडर 19 क्रिकेट स्पर्धेचं आयोजन करणं एक तोट्याचा करार आहे. वरिष्ठ संघ वगळता इतर कोणत्याही स्पर्धेला फारसा फायदा होत नाही.