T20 WC 2026: सुपर 8 फेरीतील आठ संघ निश्चित, पाकिस्तानची लढत कोणाशी ते ठरलं

टी20 वर्ल्डकप स्पर्धेचा थरार गेल्या काही दिवसांपासून रंगला आहे. या स्पर्धेत सर्वात मोठा उलटफेरही नोंदवला गेला. झिम्बाब्वेने ऑस्ट्रेलिया बाहेर काढत सुपर 8 फेरीत जागा मिळवली. त्यामुळे क्रीडाप्रेमींना आश्चर्याचा धक्का बसला. दिग्गज संघ पहिल्या फेरीतच बाद झाल्याने चर्चा तर होणारच.. दुसरीकडे, पाकिस्तान सुपर 8 फेरीत जागा मिळवेल की नाही याबाबत चर्चांना उधाण आलं होतं. कारण नामिबियाविरुद्धच्या सामन्यावर सर्वकाही अवलंबून होतं. पण पाकिस्तानने नामिबियाचा धावांनी पराभव केला आणि सुपर 8 फेरीत जागा पक्की केली. पाकिस्तानने प्रथम फलंदाजी करताना 20 षटकात 3 गडी गमवून 199 धावा केल्या. तसेच विजयासाठी 200 धावांचं आव्हान दिलं. हे आव्हान काही नामिबियाला गाठता आलं नाही आणि अमेरिकेचं सुपर 8 फेरीचं स्वप्न भंगलं.

भारत, वेस्ट इंडिज, दक्षिण अफ्रिका, झिम्बाब्वे, न्यूझीलंड, इंग्लंड, श्रीलंका यांच्यानंतर पाकिस्तान हा आठवा संघ ठरला आहे. आता 21 फेब्रुवारीपासून सुपर 8 फेरीचा थरार रंगणार आहे. सुपर आठ फेरीत दोन गट पडले असून भारताच्या गटात वेस्ट इंडिज, दक्षिण अफ्रिका आणि झिम्बाब्वे हे संघ आहेत. तर दुसऱ्या गटात पाकिस्तान, न्यूझीलंड, इंग्लंड आणि श्रीलंका हे संघ आहे. या दोन्ही गटातील टॉप 2 संघांना उपांत्य फेरीत जागा मिळणार आहे. भारताचे सामने वेस्ट इंडिज, दक्षिण अफ्रिका आणि झिम्बाब्वेशी होणार आहे. दोन्ही गटात प्रत्येक संघ 3 सामने खेळणार आहे. तीन पैकी 2 विजय मिळवणारा आणि रनरेट चांगल्या असलेल्या संघाला उपांत्य फेरीचं तिकीट मिळेल.