IND vs SL: Virat Kohli चा लकी फॅन, मैदानात येऊन पाय पकडले, त्यानंतर सूर्याच्या कृतीने जिंकलं मन

तिरुअनंतपूरम: विराट कोहलीसाठी रविवार 15 जानेवारीचा दिवस विशेष होता. तिरुवनंतपुरम येथे श्रीलंकेविरुद्ध तिसऱ्या वनडे सामन्यात विराट 166 धावांची शानदार इनिंग खेळला. कोहलीसाठी कालचा दिवस खास होताच. पण त्याच्या फॅन्ससाठी सुद्धा हा दिवस विशेष होता. त्यांनी या सामन्यात विराटला ‘याची देहा, याची डोळा’ शतक झळकवताना पाहिलं. यात एक चाहत्याच नशीब खूपच विशेष होतं.

त्याचे पाय पकडण्याचा प्रयत्न केला

श्रीलंकेविरुद्ध टीम इंडियाने 317 धावांनी मोठा विजय मिळवला. विजयानंतर अनेक खेळाडू मैदानात फिरत होते. त्याचवेळी एक मुलगा पळत मैदानात घुसला. विराट कोहलीचा हा युवा फॅन होता. कोहली जवळ जाऊन त्याने त्याचे पाय पकडण्याचा प्रयत्न केला. मागच्या काही वर्षात अनेक चाहत्यांनी कोहली आणि अन्य भारतीय खेळाडूंसाठी अशा प्रकारच प्रेम व्यक्त केलं आहे.

सूर्याच्या कृतीने मन जिंकलं

अन्य फॅन्सच्या तुलनेत या मुलाचं नशीब चांगलं होतं. त्याला फक्त कोहलीला भेटायलाच मिळाल नाही, तर कोहलीसोबत फोटो काढण्याचीही संधी मिळाली. कोहलीने सुद्धा त्याच्या या चाहत्याला निराश केलं नाही. तिथे उभ्या असलेल्या सूर्यकुमार यादवने सुद्धा महत्त्वाची भूमिका बजावली. सूर्यकुमारने स्वत: जाऊन कोहलीसोबत त्या चाहत्याचा फोटो काढला. सूर्याने आपल्या या कृतीने अनेकांच मन जिंकलं.

टीम इंडियाचा मोठा विजय

रोहित शर्माच्या नेतृत्वाखाली टीम इंडियाने श्रीलंकेविरुद्धची तीन सामन्यांची वनडे सीरीज 3-0 अशी जिंकली. सीरीजच्या शेवटच्या सामन्यात टीम इंडियाने 317 धावांनी मोठा विजय मिळवला. विराट कोहलीने श्रीलंकेविरुद्ध तिसऱ्या वनडेमध्ये धुवाधार बॅटिंग केली. त्याने श्रीलंकन बॉलर्सची चांगलीच धुलाई केली. विराट कोहली नाबाद 166 धावांची इनिंग खेळला. त्याने आपल्या इनिंगमध्ये 13 चौकार आणि 8 षटकार लगावले. विराटच हे कितवं शतक?

त्याने 74 व आंतरराष्ट्रीय शतक झळकावलं. या सीरीजमधील त्याची ही दुसरी सेंच्युरी आहे. त्याने 85 चेंडूत आपलं 46 व वनडे शतक पूर्ण केलं. कोहलीच्या शतकाची क्रिकेट विश्वात चर्चा सुरुच आहे. पण त्याचवेळी त्याने मारलेल्या एका सिक्सची सुद्धा तितकीच चर्चा आहे. सेंच्युरी मारल्यानंतर त्याने तो सिक्स मारला.