IPL : सर्वाधिक वेळा ऑरेंज कॅप जिंकणारे फलंदाज, विराट कोहली कितव्या स्थानी?

IPL Orange Cap Winners List: आयपीएल स्पर्धेच्या इतिहासात सर्वाधिक वेळा ऑरेंज कॅप जिंकण्याची कामगिरी ही ऑस्ट्रेलियाचा माजी फलंदाज डेव्हिड वॉर्नर याने केली आहे.

Ipl Virat Kohli RcbImage Credit source: PTI

Sanjay patil | Updated on: Mar 24, 2026 | 8:30 AM

आयपीएल स्पर्धेच्या 19 व्या मोसमाला 28 मार्चपासून सुरुवात होत आहे. या निमित्ताने या स्पर्धेच्या इतिहासात ऑरेंज कॅप जिंकणाऱ्या फलंदाजांबाबत जाणून घेऊयात. आपल्या संघाला विजयी करण्यात प्रमुख योगदान देणाऱ्या खेळाडूला सामनावीर पुरस्काराने गौरवण्यात येतं. त्यानुसार आयपीएल स्पर्धेतील प्रत्येक मोसमाच्या शेवटी सर्वाधिक धावा करणाऱ्या फलंदाजाला ऑरेंज कॅप देण्यात येते. तसेच सर्वाधिक विकेट्स मिळवणाऱ्या गोलंदाजाचा पर्पल कॅपने सन्मान करण्यात येतो. प्रत्येक मोसमात फलंदाज आणि गोलंदाजांमध्ये ऑरेंज आणि पर्पल कॅपसाठी चढाओढ पाहायला मिळते. अशात 19 व्या मोसमाच्या निमित्ताने आपण आतापर्यंत या स्पर्धेच्या इतिहासात सर्वाधिक वेळा ऑरेंज कॅप जिंकणाऱ्या फलंदाजांबाबत जाणून घेऊयात.

आयपीएल स्पर्धेत 18 पैकी 9 मोसमात विदेशी फलंदाजांनी ऑरेंज कॅप आपल्या नावावर करण्यात यश मिळवलं आहे. तर 9 वेळा भारतीय फलंदाजांनी ही कॅप मिळवली आहे. स्पर्धेच्या इतिहासात सर्वाधिक वेळा ऑरेंज कॅप जिंकण्याचा विक्रम ऑस्ट्रेलियाचा माजी फलंदाज डेव्हिड वॉर्नर याच्या नावावर आहे. वॉर्नर व्यतिरिक्त कोणत्या फलंदाजाने ही मानाची कॅप किती वेळा आपल्या नावावर केलीय? हे जाणून घेऊयात.

सर्वाधिक वेळा ऑरेंज कॅप जिंकणारे फलंदाज

डेव्हिड वॉर्नर याने स्पर्धेच्या इतिहासात तब्बल 3 वेळा ही ऑरेंज कॅप जिंकली आहे. यावरुन वॉर्नरने काय पद्धतीने बॅटिंग केली असेल याचा अंदाज येतो. वॉर्नरने 2015, 2017 आणि 2019 साली ऑरेंज कॅप पटकावली होती. विशेष म्हणजे वॉर्नरने सनरायजर्स हैदराबाद या एकाच टीमकडून खेळताना ही कामगिरी केली.

विराट गेलला पछाडत वॉर्नरची बरोबरी करणार?

तसेच विराट कोहली आणि ख्रिस गेल या फलंदाजांनी प्रत्येकी 2-2 वेळा ऑरेंज कॅप जिंकली आहे. विशेष म्हणजे दोघांनीही एकाच रॉयल चॅलेंजर्स बंगळुरु या संघाकडून ही कामगिरी केली आहे. डेव्हिड वॉर्नर आणि ख्रिस गेल हे दोघेही आयपीएलमधून निवृत्त झाले आहेत. त्यामुळे यंदा विराटकडे सर्वाधिक धावा करुन गेलला मागे टाकण्यासह वॉर्नरच्या विक्रमाची बरोबरी करण्याची संधी आहे.