गौतम गंभीर यांच्याशी मैदानात भिडला, नंतर ECB कर्मचाऱ्याशी वाद; आता थेट ‘त्या’ व्यक्तीने क्लबच सोडला; इंग्लंडमध्ये नेमकं काय घडलं?

शिस्तभंगाच्या कारवाईनंतर सरेचे मुख्य ग्राऊंड्समन ली फोर्टिस यांनी क्लब सोडण्याचा निर्णय घेतला आहे. 2025 मध्ये भारताच्या इंग्लंड दौऱ्यादरम्यान टीम इंडियाचे मुख्य प्रशिक्षक गौतम गंभीर यांच्यासोबत झालेल्या जोरदार वादानंतर फोर्टिस यांचे नाव चर्चेत आले होते. एक दशकाहून अधिक काळ सरेचे मुख्य ग्राऊंड्समन असलेल्या फोर्टिस यांना, ‘द हंड्रेड’ स्पर्धेतील एमआय लंडन आणि लंडन स्पिरिट यांच्यातील सामन्याच्या एक दिवस आधी ओव्हल मैदानावर इंग्लंड आणि वेल्स क्रिकेट बोर्डाच्या एका कर्मचाऱ्यासोबत झालेल्या वादानंतर जुलैमध्ये अनिश्चित काळासाठी रजेवर पाठवण्यात आले होते.

या घटनेनंतर त्यांचा सरेचे मुख्य कार्यकारी स्टीव्ह एलवर्थी यांच्यासोबतही वाद झाला. ते त्या उन्हाळ्यात कामावर परतले नाहीत. फोर्टिसच्या लिंक्डइन प्रोफाइलवरून आता असे दिसून येते की, त्यांनी ऑक्टोबरमध्ये सरे क्लब सोडला आहे. ते आता नवीन जबाबदारीसाठी तयार आहे. सरेच्या एका प्रवक्त्याने त्यांच्या क्लब सोडण्याच्या निर्णयाची पुष्टी केली आहे. “ली फोर्टिस यांनी क्लब सोडला आहे. आम्ही त्याला उज्ज्वल भविष्यासाठी शुभेच्छा देतो, असे प्रवक्ते म्हणाले.

शिस्तभंगाच्या कारवाईचे निकाल सार्वजनिक करण्यात आलेले नाहीत. क्रिकेट नियामकानेही जुलै महिन्यातील घटनेची चौकशी सुरू केली आहे. परंतु टेलिग्राफ स्पोर्टने संपर्क साधल्यावर त्यांनी कोणतीही प्रतिक्रिया दिली नाही. फोर्टिसला बडतर्फ करण्यात आल्याची सरेकडून कोणतीही अधिकृत पुष्टी आलेली नाही. जुलै 2025 मध्ये ओव्हल येथे भारत आणि इंग्लंड यांच्यातील पाचव्या आणि अंतिम कसोटी सामन्यापूर्वी गौतम गंभीरसोबत झालेल्या वादानंतर फोर्टिस पहिल्यांदा चर्चेत आला.

हा वाद भारतीय संघाच्या सराव सत्रादरम्यान झाला होता. संघ ज्या प्रकारे मुख्य मैदानाचा वापर करत होता आणि खेळपट्टीजवळ उपकरणे हाताळत होता, त्यामुळे तो ग्राऊंड्समन नाराज झाला होते. हा संपूर्ण वाद कॅमेऱ्यात कैद झाला. गंभीर फोर्टिससोबत वाद घालताना स्पष्टपणे दिसत होते. भारताचे मुख्य प्रशिक्षक असे म्हणताना ऐकू आले, तुम्ही कोणाचीही तक्रार करू शकता, पण आम्ही काय करावे हे तुम्ही आम्हाला सांगू शकत नाही. तुम्ही आम्हाला काय करायचे ते सांगणार नाही, तुम्ही फक्त एक ग्राऊंड्समन आहात.

भारताचे फलंदाजी प्रशिक्षक सितांशु कोटक यांनी नंतर ग्राऊंड स्टाफने पाहुण्या संघाशी ज्या प्रकारे संवाद साधला त्यावर टीका केली. त्यांनी फोर्टिस यांना अहंकारी म्हटले. कोटक म्हणाले की, खेळपट्टीची पाहणी करताना कोचिंग स्टाफला विकेटपासून 2.5 मीटर अंतर राखण्यास सांगितले होते. फोर्टिस यांनी भारतीय माध्यमांशी बोलताना या वादाला कमी लेखले. त्यांनी म्हटले की, यावर बोलण्यासारखे किंवा लपवण्यासारखे काहीही नाही.

40 वर्षीय फोर्टिस 2012 मध्ये सरे संघात सामील झाले होते. इंग्लिश काउंटी क्रिकेटमधील सर्वात प्रसिद्ध चेहऱ्यांपैकी एक बनले. ओव्हल येथील त्यांच्या कामामुळे त्यांना 2022 ते 2024 या सलग तीन वर्षांसाठी ‘ईसीबी ग्राउंड्स मॅनेजर ऑफ द इयर’ पुरस्कार मिळाला. सरेने त्या प्रत्येक हंगामात काउंटी चॅम्पियनशिपही जिंकली. त्यांचा हा निरोप अशा वेळी आला आहे, जेव्हा जून 2027 मध्ये ओव्हल येथे वर्ल्ड टेस्ट चॅम्पियनशिपचा अंतिम सामना आणि त्याच उन्हाळ्यात पाचवी ॲशेस कसोटी होणार आहे. सरे संघाला आता अशा ग्राउंड्समनची जागा भरावी लागेल, ज्याने एका दशकाहून अधिक काळ खेळपट्टीची देखरेख केली आहे.