IND vs ENG: टीम इंडियाच्या जखमेवर मीठ चोळलं, मॅच जिंकताच हॅरी ब्रूकने माज दाखवला, भारतीय संघाबद्दल नको ते बोलला

भारत आणि इंग्लंड यांच्यातील तीन एकदिवसीय सामन्यांच्या मालिकेतील पहिला सामना गमावल्यानंतर, यजमान इंग्लंडने दुसऱ्या सामन्यात उल्लेखनीय पुनरागमन करत मालिका 1-1 अशी बरोबरीत आणली. दुसऱ्या एकदिवसीय सामन्यात इंग्लंडच्या गोलंदाजांनी उत्कृष्ट कामगिरी करत भारताला 233 धावांवर रोखले आणि 44.1 षटकांतच हे लक्ष्य गाठले. या सामन्यात भारतीय संघ मोठी धावसंख्या उभारण्याच्या तयारीत होता, परंतु मधल्या षटकांमध्ये 60 धावांत सात गडी गमावल्याने संघाची झपाट्याने पडझड झाली. परिणामी सामना इंग्लंडने जिंकला. आता दुसरा सामना जिंकताच इंग्लंडचा कर्णधार हॅरी ब्रुकने भारतीय संघाच्या जखमेवर मीठ चोळलं.

कार्डिफ एकदिवसीय सामन्यानंतर इंग्लंडचा कर्णधार हॅरी ब्रुकने आपल्या गोलंदाजांचे कौतुक केले आणि म्हणाला, “आम्ही अजूनही मालिकेत आहोत आणि आता आम्ही अंतिम सामन्याची वाट पाहत आहोत. मला वाटते की भारताला 233 धावांवर रोखणे हा आमच्याकडून एक जबरदस्त प्रयत्न होता. ३० षटकांनंतर भारतीय संघाची धावसंख्या 3 गडी बाद 180 होती आणि ते मोठी धावसंख्या उभारण्याच्या तयारीत दिसत होते. सॅम करन आणि विल जॅक्स यांनी उत्कृष्ट गोलंदाजी केली, पण अखेरीस त्यांनी 60 धावांत सात गडी गमावले, जे मला थोडे विचित्र वाटले. खेळपट्टीची परिस्थिती लक्षात घेता, आम्ही अंतिम 11 खेळाडूंमध्ये एका अतिरिक्त वेगवान गोलंदाजाचा समावेश केला, जो एक शहाणपणाचा निर्णय होता.

दुसऱ्या एकदिवसीय सामन्यात, लक्ष्याचा पाठलाग करताना इंग्लंडची सुरुवात खराब झाली आणि त्यांचे दोन्ही सलामीचे फलंदाज आठ धावांवर बाद झाले. त्यांचा सर्वात अनुभवी खेळाडू, जो रूट, एका टोकावर टिकून राहिला आणि नाबाद 99 धावा करून इंग्लंडला विजय मिळवून दिला. याबद्दल हॅरी ब्रुक म्हणाला, “तो एक जबरदस्त खेळाडू आहे आणि ड्रेसिंग रूममध्येही तुम्ही त्याच्याकडून खूप काही शिकू शकता. मला काही वर्षांपूर्वीची त्याची एक खेळी आठवते, ज्यात त्याने फक्त तीन चौकार मारून 100 धावा केल्या होत्या, जे आश्चर्यकारक आहे. आता आम्ही शेवटच्या एकदिवसीय सामन्याकडे लक्ष देत आहोत आणि तेथील परिस्थिती पाहून तो सामना जिंकण्याचा प्रयत्न करू. “