…म्हणून ऑस्ट्रेलिया दौऱ्यात भारताचं पारडं जड : कांबळी

मुंबई : वेस्ट इंडिजसोबतचा सध्या सुरु असलेला मुकाबला संपल्यानंतर टीम इंडिया ऑस्ट्रेलिया दौऱ्यावर जाणार असून, ऑस्ट्रेलियातील टीम इंडियाच्या कामगिरीची क्रिकेट रसिकांना मोठी उत्सुकता आहे. मात्र, ऑस्ट्रेलिया दौऱ्यात टीम इंडियाचं पारडं जड असेल, असा अंदाज भारताचा माजी क्रिकेटर विनोद कांबळीने वर्तवला आहे. तसेच, ऑस्ट्रेलियाविरोधातील कसोटी मालिका टीम इंडिया सहजपणे खिशात घालेल, असा विश्वासही विनोद कांबळीने व्यक्त केला.

विनोद कांबळीने नेमका काय अंदाज व्यक्त केला?

“स्टीव्ह स्मिथ आणि डेव्हीड वॉर्नर यांच्या अनुपस्थितीत भारत ऑस्ट्रेलियाविरूद्ध कसोटी मालिकेत खेळत आहे. त्याचा फायदा भारताला नक्की होईल. तसेच रन मशिन विराट कोहली चांगलाच फॉर्मात असल्याने भारताला ही कसोटी मालिका जिंकणं अवघड होणार नाही.”, असा अंदाज विनोद कांबळीने व्यक्त केला.

भारताच्या दौऱ्याची सुरुवात तीन टी-20 सामन्यांच्या मालिकेने होईल, ज्यानंतर 6 डिसेंबरपासून चार सामन्यांच्या कसोटी मालिकेला सुरुवात होईल.

स्मिथ आणि वॉर्नरवर एक-एक वर्षांची बंदी

मार्च महिन्यात दक्षिण आफ्रिकेत चेंडूशी छेडछाड केल्याप्रकरणी स्मिथ आणि वॉर्नर यांच्यावर प्रत्येकी एक-एक वर्षाची बंदी घालण्यात आली होती. तर कॅमरन बॅनक्राफ्टवर नऊ महिन्यांची बंदी घातली होती. तेव्हापासून ऑस्ट्रेलिया संघाची ताकद काहीशी कमी झाली आहे.

ऑस्ट्रेलियाविरुद्ध टी-20 मालिकेसाठी भारतीय संघ

विराट कोहली (कर्णधार), रोहित शर्मा (उपकर्णधार), शिखर धवन, केएल राहुल, श्रेयस अय्यर, मनीष पांडे, दिनेश कार्तिक, रिषभ पंत (यष्टिरक्षक), कुलदीप यादव, युजवेंद्र चहल, वॉशिंग्टन सुंदर, कृणाल पांड्या, भुवनेश्वर कुमार, जसप्रीत बुमराह, उमेश यादव, खलील अहमद

ऑस्ट्रेलियाविरुद्धच्या कसोटी मालिकेसाठी संघ

विराट कोहली (कर्णधार), मुरली विजय, लोकेश राहुल, पृथ्वी शॉ, चेतेश्वर पुजारा, अजिंक्य रहाणे, हनुमा विहारी, रोहित शर्मा, रिषभ पंत, पार्थिव पटेल, रवीचंद्रन अश्विन, रवींद्र जाडेजा, कुलदीप यादव, मोहम्मद शमी, इशांत शर्मा, उमेश यादव, जसप्रीत बुमरा, भुवनेश्वर कुमार

ऑस्ट्रेलिया दौऱ्याचं वेळापत्रक

टी-20 मालिका

पहिला सामना – 21 नोव्हेंबर

दुसरा सामना – 23 नोव्हेंबर

तिसरा सामना – 25 नोव्हेंबर

कसोटी मालिका

पहिला सामना – 6 डिसेंबर

दुसरा सामना – 14 डिसेंबर

तिसरा सामना – 26 डिसेंबर

चौथा सामना – 3 जानेवारी

वन डे मालिका

पहिला सामना – 12 जानेवारी

दुसरा सामना – 15 जानेवारी

तिसरा सामना – 18 जानेवारी