फिफा वर्ल्डकप स्पर्धेतून बाहेर पडताच उरुग्वे संघाला शिक्षा, चार्टर फ्लाइट केलं रद्द! आता परतणार कसे?

Uruguay, FIFA World Cup 2026: फिफा वर्ल्डकप 2026 स्पर्धेतील साखळी फेरीचे सामने संपले असून राउंड ऑफ 32 फेरीचे सामने सुरू होणार आहेत. असं असताना साखळी फेरीत एच गटात मोठा उलटफेर पाहायला मिळाला. या स्पर्धेच्या साखळी फेरीतच उरुग्वे संघाचं आव्हान संपुष्टात आलं आहे. या स्पर्धेत उरुग्वे संघाची कामगिरी निराशाजनक राहिली. या निराशाजनक कामगिरीनंतर उरुग्वे फुटबॉल असोसिएशनने एक मोठा आणि कठोर निर्णय घेतला आहे. खेळाडू आणि कोचिंग स्टाफसाठी बूक केलेलं विशेष चार्टर फ्लाइट रद्द केलं आहे. कोणत्याही मोठ्या स्पर्धेनंतर राष्ट्रीय संघ त्यांच्या महासंघानी बुक केलेल्या चार्टर विमानाने एकत्रित मायदेशी परततात. पण उरुग्वे फुटबॉल असोसिएशनने मेक्सिकोमधील त्यांच्या बेस कॅम्पवरून राजधानी मॉन्टेव्हिडिओला जाणारे चार्टर विमान रद्द केले आहे. मिडिया रिपोर्टनुसार, फेडरेशनने हा निर्णय वर्ल्डकप स्पर्धेतून धक्कादायक आणि अपेक्षाआधीच बाद झाल्याने घेतला आहे.

उरुग्वे फुटबॉल महासंघाने चार्टर फ्लाईट रद्द केल्याने आता संपू्र्ण संघाला एकत्र येता येणार नाही. सर्व फुटबॉलपटू आणि कर्मचारी सदस्यांना आता व्यावसायिक विमानाद्वारे आपल्या प्रवासाठी स्वतंत्र व्यवस्था करावी लागेल. दुसरीकडे, महासंघाने बजेटचे योग्य व्यवस्थापन करण्यासाठी आणि खेळाडूंना त्यांच्या इच्छेनुसार सुट्टीवर किंवा आपापल्या क्लबमध्ये परत जाण्याची मुभा देण्यासाठी हा निर्णय घेतल्याचे बोललं जात आहे.  काही खेळाडू सुट्ट्यांसाठी किंवा युरोप आणि इतर देशातील क्लबमध्ये सहभागी होण्यासाठी थेट मॉन्टेव्हिडिओला परततील.

उरुग्वेची सुमार कामगिरी

फिफा वर्ल्डकप 2026 स्पर्धेत दोन वेळचा वर्ल्डकप विजेता उरुग्वे संघ एच गटात होता. या गटात स्पेन, केप वर्डे आणि सौदी अरब हे संघ होते. या गटातून स्पेन आणि उरुग्वे पुढच्या फेरीत जागा मिळवतील असंच सुरूवातीला वाटलं होतं. पण या स्पर्धेत उलटफेर पाहायला मिळाला. उरुग्वे सौदी अरब आणि केप वर्डेविरुद्धचा सामना जिंकण्यात अपयशी ठरले. हे दोन्ही सामने अनिर्णित ठरले. त्यामुळे शेवटचा सामना करो या मरोची लढाई होती. पण स्पेनने उरुग्वेला 1-0 ने मात दिली आणि स्वप्न भंग झाला. या गटातून स्पेन आणि केप वर्डे राउंड ऑफ 32 मध्ये पोहोचले.