T20 WC : बॅट्समन क्रीजच्या बाहेर होता, विकेटकीपरकडून स्टम्पिंग, पण तरीही ICC च्या या नियमामुळे फलंदाज NOT OUT

Oman vs Ireland T20 World Cup 2026 : T20 वर्ल्ड कप 2026 मध्ये 22 वा सामना खूप रोमांचक ठरला. मैदानातील एका आश्चर्यकारक घटनेने सगळ्यांच लक्ष वेधून घेतलं. कोलंबोच्या सिंहलीज स्पोर्ट्स क्लब ग्राऊंडवर आयर्लंड आणि ओमानमध्ये सामना सुरु होता. आयर्लंडच्या टीमने पहिली बॅटिंग केली. इनिंगच्या 8 व्या ओव्हरमधील एका स्टम्पिंगने प्रत्येकाला कंफ्यूज केलं. आधी वाटलं फलंदाज आऊट झालाय. पण आयसीसीच्या नियमाने फलंदाजाला वाचवलं.

मॅचची 8 वी ओव्हर सुरु होती. ओमानचा स्पिनर आमिर कलीमने लोर्कन टकरला पाचवा लेंथ बॉल टाकला. टकर पुढे जाऊन फ्लिक करण्याच्या प्रयत्नात चूकला. तो क्रीजच्या बाहेर होता. त्यावेळी विकेटकीपर विनायक शुक्लाने लेग साईडचा चेंडू उत्तमरित्या पकडला. त्यावेळी विकेटकिपर थोडासा घसरला. पण त्याने स्वत:ला संभाळत बेल्स उडवल्या. त्यावेळी फलंदाज बाद झाल्याचं दिसत होतं.

नियम काय सांगतो?

सर्वांना असं वाटलं की टकर आऊट झालाय. कारण तो क्रीजमध्ये परतला नाही. पण अंपायरच्या नजरेने एक गोष्ट हेरली. शुक्लाने, चेंडू ज्या हातात नव्हता, त्याने बेल्स उडवले होते. चेंडू डाव्या हातात होता. पण बेल्स त्याने उजव्या हाताने उडवले होते. क्रिकेट नियमानुसार, स्टम्पिंगच्यावेळी चेंडू ज्या हातात आहे, त्यानेच बेल्स उडवले पाहिजेत. स्टम्पिंग करताना दोन्ही हात परस्परांशी जोडलेले नसतील, चेंडू वेगळ्या हातात असेल, तर ती लीगल स्टम्पिंग मानली जात नाही.

ऑस्ट्रेलिया-पाकिस्तान सीरीजमध्ये सुद्धा असच घडलेलं

या महिन्याच्या सुरुवातीला ऑस्ट्रेलिया-पाकिस्तान सीरीजवेळी सुद्धा अशीच घटना घडली होती. पाकिस्तानचा लेफ्टी स्पिनर मोहम्मद नवाजच्या चेंडूवर कूपर कोनोली स्टम्पआऊट झाला होता. विकेटकिपर ख्वाजा नफेने लेग साईडला चेंडू पकडलेला व बेल्स उडवलेले. पण चेंडू नफेच्या उजव्या हातात होता. त्यावेळी अंपायरने लक्ष न देता आऊट दिलेलं. खरतर तो फलंदाज नॉटआऊट होता. पण यावेळी अंपायरने योग्य निर्णय दिला.