महत्त्वाची बातमी! या लोकांना 1 मार्चपासून व्हॉट्सॲप वापरता येणार नाही, काय आहे सिम बाइंडिंगचा नियम?

देशभरातील करोडो नागरिकांसाठी महत्त्वाची बातमी आहे. सिम-बाइंडिंग नियमाबाबत केंद्र सरकारने कडक भूमिका घेतली आहे. समोर आलेल्या माहितीनुसार केंद्र सरकारने असे स्पष्ट केले आहे की, आता मेसेजिंग ॲप्सना त्यांचे अकाउंट सिम कार्डशी लिंक करणे बंधनकारक असणार आहे. याबाबत कोणतीही सूट देण्याचा सरकारचा विचार नाही. त्यामुळे आता 1 मार्चपासून सरकार या नियमाची कडक अंमल बजावणी करणार आहे. दूरसंचार विभागाने (DoT) OTT मेसेजिंग ॲप्सना याबाबत स्पष्टपणे निर्देश दिले आहेत. त्यामुळे अनेक यूजर्सना व्हॉट्सॲप वापरता येणार नाही. याबाबत सविस्तर माहिती जाणून घेऊयात.

व्हॉट्सॲपवर काय परिणाम होणार?

सिम-बाइंडिंग नियम लागू झाल्यानंतर व्हॉट्सॲप वापरताना अडचणींचा सामना करावा लागू शकतो. या नियमांनुसार जर व्हॉट्सॲप किंवा टेलिग्राम नोंदणी करण्यासाठी वापरलेले सिम कार्ड फोनमध्ये नसेल, तर ॲपचा वापर मर्यादित होऊ शकतो किंवा बंदही होऊ शकतो. महत्त्वाची बाब म्हणजे भारतात सर्वाधिक व्हॉट्सॲप वापरकर्ते आहेत. यातील अनेक लोक वेगवेगळ्या डिव्हाइसवर एकच नंबर वापरतात. त्यामुळे 1 तारखेपासून अनेक डिव्हाइसवर एकच खाते सक्रिय केलेल्या लाखो वापरकर्त्यांचे व्हॉट्सॲप काम करणार नाही.

केंद्रीय मंत्री ज्योतिरादित्य सिंधिया यांच्या हवाल्याने अनेक बातम्या समोर आल्या आहेत. सिंधिया यांनी म्हटले की, सुरक्षा प्रथम येते आणि सिम-बाइंडिंग नियमांमध्ये कोणताही बदल होणार नाही. सरकारला वाटत आहे की डिजिटल फसवणूक आणि बनावट नंबर वापरून होणारे गुन्हे रोखण्यासाठी हे पाऊल आवश्यक आहे. त्यामुळे हा निर्णय घेण्यात आला आहे.

सिम बाइंडिंगचा परिणाम कोणावर होणार?

• एकाच सिम कार्ड वापरून अनेक डिव्हाइसवर व्हॉट्सॲप वापरतात किंवा जे वारंवार सिम कार्ड बदलतात त्यांना याचा फायदा होऊ शकतो.
• हा नियम लागू झाल्यानंतर व्हॉट्सॲप वेब दर सहा तासांनी आपोआप लॉग आउट होईल. यानंतर पुन्हा लॉगिन करावे लागेल.

सिम बाइंडिंगनंतर व्हॉट्सॲपचे लिंक्ड डिव्हाइसेस काम करणार का?

व्हॉट्सॲपच्या लिंक्ड डिव्हाइसेस या फीचरमुळे व्हॉट्सॲप एकाच नंबर वापरून अनेक डिव्हाइसेसवर उघडता येते. मात्र या नियमामुळे यावर निर्बंध लादले जाणार आहेत. सिम बाइंडिंग नियमानंतर, लिंक्ड डिव्हाइस पूर्णपणे काम करणे थांबवणार नाही, मात्र यावर मर्यादा येणार आहेत. कारण व्हॉट्सॲप फक्त त्या फोनवर काम करेल ज्यामध्ये व्हॉट्सॲप खाते तयार करण्यासाठी वापरलेले सिम कार्ड आहे. जर डिव्हाइसमधून सिम कार्ड काढून टाकले तर व्हॉट्सॲप बंद पडण्याची शक्यता आहे.