Whatsapp Web Down : व्हॉट्सॲपमध्ये मोठी तांत्रिक अडचण, युजर्सला मोठा फटका, कसे कराल लॉगिन?

सोशल मीडियावर प्रसिद्ध मेसेजिंग प्लॅटफॉर्म असलेल्या व्हॉट्सॲप वेबमध्ये मोठी तांत्रिक अडचण निर्माण झाली आहे. त्यामुळे अनेक युजर्सला याचा फटका बसला आहे. आयफोन (iPhone) वापरणाऱ्या युजर्सला याचा सर्वाधिक फटका बसला असून त्यांना लॅपटॉप किंवा कॉम्प्युटरवर लॉग इन करताना अडचणींचा सामना करावा लागत आहे. आज सकाळपासूनच व्हॉटसअॅप वेबची ही सेवा विस्कळीत झाल्याचे पाहायला मिळत आहे.

डाऊनडिटेक्टर या वेबसाईटने दिलेल्या माहितीनुसार, आज सकाळी ८.३० वाजल्यापासून आम्हाला अनेक युजर्सने व्हॉटसअॅप वेबमध्ये अडचण असल्याचे सांगितले. यातील ५६ टक्के युजर्सला व्हॉटसअॅप वेब वापरताना अडचणी येत होत्या. तर ३९ टक्के लोकांना ॲपमध्ये, तर ६ टक्के युजर्सला व्हॉटअॅप मेसेंजर वापरताना तांत्रिक अडचणी येत असल्याचे त्यांनी सांगितले. यात भारतातील २५ टक्क्याहून अधिक लोक आहेत.

फक्त आयफोन युजर्सला समस्या, अँड्रॉइड वापरकर्त्यांसाठी सेवा सुरळीत

मिळालेल्या माहितीनुसार, आज सकाळपासूनच व्हॉट्सॲप वेब डाऊन झाल्याची समस्या प्रामुख्याने iOS (iPhone) युजर्सला होताना दिसत आहे. मात्र अँड्रॉइड वापरकर्त्यांसाठी सेवा सुरळीत सुरू असल्याचे बोललं जात आहे. आयफोन वापरणारे अनेक युजर्स व्हॉट्सॲपचे क्यूआर (QR) कोड स्कॅन केल्यानंतरही लॅपटॉपशी कनेक्ट होत नसल्याचे पाहायला मिळत आहे. तसेच काही युजर्सला एरर मेसेजही येत आहे. यामुळे जगभरातील लोक त्रस्त झाले आहेत.

या समस्येमुळे हैराण झालेल्या अनेक युजर्सने ट्वीटरवर पोस्ट करत राग व्यक्त केला आहे. यावेळी एका युजर्सने सर्व वापरकर्त्यांसाठी व्हॉट्सअॅप बंद आहे का? असा सवाल केला आहे. तर दुसऱ्या एका युजर्सने आयफोन लिंक होत नसल्याने संताप व्यक्त केला आहे. एकीकडे युजर्सकडून सतत तक्रारी येत असतानाही व्हॉट्सअॅपची मूळ कंपनी असलेल्या मेटा (Meta) कडून याबद्दल अद्याप कोणतीही अधिकृत प्रतिक्रिया देण्यात आलेली नाही. तसेच सध्या डाऊन असलेले व्हॉट्सॲप पुन्हा पूर्ववत कधी सुरु होणार, याबद्दलही कोणतेही स्पष्टीकरण देण्यात आलेले नाही.

व्हॉट्सॲप वेबवर लॉग इन होत नाही, ही पद्धत वापरा?

• जर तुम्हालाही व्हॉट्सॲप वेबवर लॉग इन करताना अडचणींचा सामना करावा लागत असेल तर तुम्ही वापरत असलेले ब्राऊझर सतत रिफ्रेश करा.
• तसेच तुम्हाला स्क्रीनवर दाखवत असलेला क्यूआर कोड पुन्हा स्कॅन करा.
• त्यासोबतच जर तुम्ही बऱ्याच काळापासून तुमचे व्हॉट्सॲप अपडेट केले नसेल तर ते करा. यानंतर पुन्हा प्रयत्न करुन पाहा.
• यामुळे तुमची समस्या सुटू शकते. तसेच तुम्हाला सहजपणे व्हॉट्सॲप वेब लॉगइन करता येऊ शकते.