डी-मार्ट पेक्षाही स्वस्त कपडे, 250 रुपयांमध्ये जीन्स तर टी-शर्ट 80 रुपये, मुलींची खरेदीसाठी असते प्रचंड गर्दी

सण असो किंवा लग्न समारंभ, कॉलेजचे नवीन सत्र असो किंवा मित्रांसोबत फिरण्याचा प्लॅन. प्रत्येकालाच स्टायलिश दिसण्याची इच्छा असते. मात्र, महागड्या ब्रँडेड कपड्यांच्या किमती बजेट बिघडवू शकतात. अशावेळी दिल्लीतील काही प्रसिद्ध बाजार स्वस्तात आणि ट्रेंडी कपडे खरेदी करण्यासाठी उत्तम पर्याय ठरतात. येथे टॉप, जीन्स, शर्ट, कुर्त्या, ड्रेस आणि लहान मुलांचे कपडेही तुलनेने कमी किमतीत मिळतात.

सरोजिनी नगर मार्केट

दिल्लीतील सरोजिनी नगर मार्केट स्वस्त आणि फॅशनेबल कपड्यांसाठी प्रसिद्ध आहे. येथे महिलांचे टॉप, ड्रेस, जीन्स, जॅकेट, तसेच पुरुषांचे शर्ट आणि टी-शर्ट मिळतात. टॉपच्या किमती साधारण 100 ते 300 रुपये तर जीन्स 250 ते 600 रुपयांपर्यंत असू शकतात. येथे खरेदी करताना घासाघीस केल्यास चांगला सौदा मिळू शकतो.

लाजपत नगर मार्केट

एथनिक आणि वेस्टर्न कपड्यांची खरेदी करायची असल्यास लाजपत नगर मार्केट हा चांगला पर्याय आहे. येथे कुर्त्या, सलवार सूट, दुपट्टे, पुरुषांचे कुर्ते आणि कॅज्युअल कपड्यांचे विविध प्रकार मिळतात. कुर्त्यांची किंमत साधारण 250 रुपयांपासून सुरू होऊ शकते तर दुपट्टे 100 ते 500 रुपयांपर्यंत मिळू शकतात.

जनपथ मार्केट

कनॉट प्लेसजवळ असलेले जनपथ मार्केट हटके फॅशन आणि आकर्षक कपड्यांसाठी ओळखले जाते. येथे प्रिंटेड टॉप, स्कर्ट, जॅकेट, बॅग, दागिने आणि कॅज्युअल कपड्यांचे पर्याय उपलब्ध आहेत. काही कपडे आणि फॅशनच्या वस्तू साधारण 150 ते 500 रुपयांच्या बजेटमध्ये मिळू शकतात.

गांधी नगर मार्केट

पूर्व दिल्लीतील गांधी नगर मार्केट हे रेडिमेड कपड्यांच्या मोठ्या घाऊक बाजारांपैकी एक आहे. येथे शर्ट, टी-शर्ट, जीन्स, ट्राउझर्स आणि लहान मुलांचे कपडे मोठ्या प्रमाणात मिळतात. घाऊक खरेदी करणाऱ्यांसाठी हा बाजार फायदेशीर ठरू शकतो. काही टी-शर्ट साधारण 80 ते 250 रुपये, तर शर्ट 150 ते 500 रुपयांपर्यंत मिळू शकतात. मात्र, काही दुकानांमध्ये किमान ठरावीक प्रमाणात खरेदी करावी लागू शकते.

खरेदी करताना या गोष्टी लक्षात ठेवा!

या बाजारांमध्ये खरेदी करताना एकाच वस्तूची किंमत वेगवेगळ्या दुकानांत विचारून घ्या. कपड्यांची गुणवत्ता, शिवण आणि साइज तपासूनच खरेदी करा. तसेच, दिलेल्या किमती अंदाजित असून त्या डिझाइन, गुणवत्ता आणि दुकानानुसार बदलू शकतात.