फॉर्च्यूनर गाडी, VIP नंबर अन्… इंदोरीकर महाराजांच्या जावायाचा थाट, नवा व्हिडीओ तुफान व्हायरल!
सध्या सोशल मीडियावर कीर्तनकार इंदोरीकर यांच्या जावयाचा जुना व्हिडीओ व्हायरल होत आहे. या व्हिडीओमध्ये तो पूजा करत असलेल्या गाडीने सर्वांचे लक्ष वेधले आहे.
प्रसिद्ध कीर्तनकार आणि समाजप्रबोधनकार इंदोरीकर महाराज यांच्या कन्येचा, ज्ञानेश्वरीचा शाही विवाहसोहळा नुकताच पार पडला. ३ मे रोजी संगमनेरमध्ये अत्यंत थाटामाटात पार पडला. या भव्य सोहळ्यासाठी तब्बल १०० एकरांवर मंडप उभारण्यात आला होता. या विवाहाला देवेंद्र फडणवीस आणि एकनाथ शिंदे यांच्यासह राज्यातील अनेक दिग्गज राजकीय नेते, मंत्री, आमदार, खासदार आणि वारकरी संप्रदायातील मान्यवरांनी हजेरी लावली होती. मात्र, लग्नानंतर आता इंदोरीकर महाराजांचे जावई एका वेगळ्याच कारणामुळे चर्चेत आले आहेत.
जावयाच्या गाडीवरील ‘त्या’ स्टिकरमुळे चर्चेला उधाण
सध्या इंदोरीकर महाराजांची मुलगी ज्ञानेश्वरी आणि जावई साहिल चिलप यांचा एक इन्स्टाग्राम व्हिडिओ सोशल मीडियावर व्हायरल होत आहे. हे नवदाम्पत्य शिर्डीत साईबाबांच्या दर्शनासाठी गेले असता, त्यांनी तिथे एका गाडीची पूजा केली. मात्र, या व्हिडिओमध्ये गाडीवर लावण्यात आलेल्या ‘VVIP’ आणि ‘लोकसभा सदस्य (MP)’ या स्टिकर्सनी सर्वांचे लक्ष वेधून घेतले असून अनेकांच्या भुवया उंचावल्या आहेत.
View this post on Instagram
नेटकरी विचारतायत, चिलप घराण्यात खासदार कोण?
साहिल चिलप यांच्या इन्स्टाग्राम अकाऊंटवरील माहितीनुसार, ही गाडी त्यांनी डिसेंबरमध्ये खरेदी केली होती. मात्र, नंतर या गाडीवर VVIP आणि MP (खासदार) असल्याचे स्टिकर लावण्यात आले. यावरून आता लोकांच्या मनात अनेक प्रश्न निर्माण झाले आहेत. साहिल चिलप हे स्वतः खासदार नसताना त्यांनी गाडीवर असा लोगो का लावला?, चिलप कुटुंबात किंवा नातेवाईकांमध्ये कोणी खासदार आहे का? की ही गाडी एखाद्या खासदाराला वापरण्यासाठी दिली जाते? आणि तसे असल्यास ते खासदार नेमके कोण आहेत? असे अनेक प्रश्न नेटकऱ्यांना पडले आहेत.
कोण आहेत साहिल चिलप?
ज्ञानेश्वरी यांचे पती साहिल चिलप हे नवी मुंबईतील प्रसिद्ध उद्योजक सुनील विष्णू चिलप आणि मनीषा चिलप यांचे सुपुत्र आहेत. सध्या हे कुटुंब पनवेलमध्ये वास्तव्यास असले, तरी त्यांचे मूळ गाव जुन्नर तालुक्यातील काटेडे हे आहे. शिवनेरी किल्ल्याच्या पायथ्याशी त्यांचा एक भव्य आणि आलिशान बंगला आहे, जिथून किल्ल्याचे सुंदर दृश्य दिसते. चिलप कुटुंब हे अत्यंत धार्मिक प्रवृत्तीचे असून, त्यांच्या घरात २४ तास अखंड हरिपाठ सुरू असतो, अशी माहिती समोर आली आहे.
