Tipu Sultan च्या काळातल्या मंदिरातील “सलाम आरतीचं” नाव बदललं, BJP सरकारने सांगितलं कारण
आपण ही नावं नेमकी का बदलतोय याचं कारण सरकारने दिलंय, जाणून घेऊया त्याबद्दल.
कर्नाटक सरकारने 18 व्या शतकातील राजा टिपू सुलतानच्या काळातील मंदिरांमधील आरतींची नावं बदलण्याचा निर्णय घेतलाय. सलाम आरती, सलाम मंगल आरती आणि दीवतिगे सलाम आरतींची नावं बदलण्याचा हा निर्णय आहे. या प्रथांची नावं बदलून त्याला स्थानिक नावं देण्यात येणार आहे, असा निर्णय भाजप सरकारने घेतलाय. आपण ही नावं नेमकी का बदलतोय याचं कारण कर्नाटक सरकारने दिलंय, जाणून घेऊया त्याबद्दल.
टिपू सुलतानच्या काळातील मंदिरांमध्ये होणाऱ्या ‘सलाम आरती’, ‘दीवतिगे सलाम’ आणि ‘सलाम मंगल आरती’चे नाव स्थानिक नावांनी बदलण्याचा निर्णय सरकारने घेतला आहे, असे कर्नाटकच्या मंत्री शशिकला जोल्ले यांनी सांगितले. प्रथा परंपरांचं फक्त नाव बदलण्यात येणार आहे, ही परंपरा बंद होणार नाही, असे मंत्र्यांनी स्पष्ट केले.
आता दीवतिगे सलामचे नाव “दीवतिगे नमस्कार”, सलाम आरतीचं नाव “नमस्कार आरती” आणि सलाम मंगल आरतीचं नाव “मंगल आरती” असे नाव देण्यात येईल, असं निश्चित करण्यात आलंय असं मंत्री शशिकला जोल्ले यांनी सांगितले. हा निर्णय विभागातील वरिष्ठ पुजाऱ्यांच्या मतावर आधारित आहे. याबाबत परिपत्रकही काढण्यात येणार आहे.
शशिकला जोल्ले म्हणाल्या की, कर्नाटकच्या राज्य धार्मिक परिषदेच्या बैठकीत काही भाविकांनी या आरत्यांच्या नामांतराची मागणी केली होती, याकडे काही सदस्यांनी लक्ष वेधलं होतं. बैठकीत यावर विस्तृत चर्चा झाली.
मंत्री शशिकला जोल्ले म्हणाल्या की, प्रथा परंपरा पूर्वीप्रमाणेच सुरू राहतील. फक्त त्यांची नावं बदलली जातील. या नावात आपल्या भाषेतील शब्दांचा समावेश असेल.
विशेष म्हणजे, भाजप आणि काही हिंदू संघटना टिपू सुलतानला ‘क्रूर हत्यारा’ म्हणून पाहतात. याशिवाय काही कन्नड संघटना टिपू सुलतानला कन्नडविरोधीही संबोधतात.
टिपूने स्थानिक भाषेऐवजी पर्शियन भाषेचा प्रचार केला, असा आरोप त्याच्या वतीने केला जातो. म्हणूनच या आरत्यांची नावं बदलून ती नावं स्थानिक भाषेत बदलण्यात येणार आहेत.
