भारतातलं असं रेल्वे स्टेशन जिथे फक्त आणि फक्त महिला कर्मचारी काम करतात, जगात वाह वाह!

भारतीय रेल्वे स्थानकाद्वारे गांधी नगर, राजस्थान इथे देशातील पहिले महिला रेल्वे स्थानक घोषित करण्यात आले आहे. भारतीय रेल्वेने सर्व महिला रेल्वे कर्मचाऱ्यांना उत्तर पश्चिम रेल्वे अंतर्गत जयपूर जिल्ह्यातील गांधी नगर रेल्वे स्थानकावर नियुक्त केले आहे. हे रेल्वे स्थानक असे पहिले स्थानक आहे जिथे संपूर्ण ऑपरेशन आणि देखभाल महिला कर्मचाऱ्यांकडून केली जाते. केवळ तिकीट विक्रेतेच नाही तर तिकीट कलेक्टर, स्टेशन मास्तर, स्वच्छता कर्मचारी यांसह सर्व कामे इथे फक्त आणि फक्त महिला कर्मचारीच सांभाळतात.

संयुक्त राष्ट्रानेही हा व्हिडिओ ट्विटरवर शेअर केला आहे. राजस्थानमधील गांधी नगर रेल्वे स्थानकात 40 महिला कर्मचारी आहेत आणि ते पुरुषांपेक्षा अधिक प्रभावीपणे काम करत आहेत. या रेल्वे स्थानकावरून एका दिवसात 50 गाड्या जातात, ज्यामध्ये 24 गाड्या थांबतात. इथे दररोज सुमारे 7000 प्रवासी येतात.

जलद सेवा, कमी रांगा, सीसीटीव्ही कॅमेरे आणि उत्तम स्वच्छता या बाबतीत प्रवाशांच्या अनुभवात बरेच बदल झाले आहेत. महिला प्रवाशांच्या सुविधेसाठी रेल्वे स्थानकावर महिला पोलीस ठाण्याचे उद्घाटन करण्यात आले व सॅनिटरी नॅपकिन व्हेंडिंग मशीन बसविण्यात आले.

महिला कर्मचाऱ्यांचे सक्षमीकरण करण्याच्या उद्देशाने, भारतीय रेल्वेने रेल्वे स्थानकाच्या संपूर्ण देखभालीमध्ये महिला कर्मचाऱ्यांना सहभागी करून घेण्यासाठी हा उपक्रम सुरू केला आहे. याचा सामाजिक प्रभाव पडेल आणि एक आदर्श निर्माण होईल.

भारतासारख्या देशात जिथे महिलांचा श्रमशक्तीमध्ये सहभाग फक्त 27% आहे तिथे महिला स्वत: रेल्वे स्थानक व्यवस्थापित करण्यास सक्षम आहेत हे एक चांगले लक्षण आहे.

मुंबई झोनचे माटुंगा रेल्वे स्थानक देखील सर्व-महिला कर्मचाऱ्यांद्वारे व्यवस्थापित केले जाते आणि ते उप-शहरी श्रेणीत आहे, तर गांधी नगर रेल्वे स्थानक मुख्य लाइन श्रेणीतील देशातील पहिले सर्व महिला स्थानक आहे.