शर्टलेस झालेल्या ‘सलमान’ला जामीन; पोलिसांच्या कारवाईचं कौतुक, भाईला आता भाईजानला भेटायचंय!

अभिनेता सलमान खानच्या (Salman Khan) स्टाइलची कॉपी करत भररस्त्यात गोंधळ घातलेल्या आझम अन्सारी (Azam Ansari) या तरुणाला लखनऊमधील ठाकूरगंज पोलिसांनी रविवारी संध्याकाळी अटक केली होती. सलमानच्या या चाहत्याला सोमवारी स्थानिक कोर्टाने जामीन मंजूर केला. पोलिसांनी केलेली कारवाई ही योग्यच होती, असं तो सुटका होताच म्हणाला. आझम हा सलमानचा खूप मोठा चाहता आहे. शर्ट उतरवण्याची सलमानची स्टाइल त्याचे लाखो चाहते कॉपी करतात. आझमनेही तेच केलं, मात्र भररस्त्यात. रस्त्यावरील या गोंधळामुळे पोलिसांनी त्याला ताब्यात घेतलं होतं. आझमचा हा व्हिडीओ सोशल मीडियावर चांगलाच व्हायरल झाला आहे.

जामिनावर सुटका झाल्यानंतर ‘टाइम्स ऑफ इंडिया’शी बोलताना तो म्हणाला, “अटक झाल्याचं मला काहीच दु:ख नाही. पोलिसांनी योग्य ती कारवाई केली. कोणत्याच पोलीस अधिकाऱ्याने माझ्याशी गैरवर्तणूक केली नाही आणि वरिष्ठ पोलीस अधिकारीसुद्धा योग्य वागणूक देत होते. सलमान खानचा मी खूप मोठा चाहता आहे. सलमान नेहमीच गरीबांची आणि गरजूंची मदत करतो. तो स्वत:लाही फिट ठेवतो. 15 वर्षांपूर्वी माझं वजन खूप वाढलं होतं. 128 किलो माझं वजन होतं. सलमानचा चाहता असल्याने मी त्याचे सर्व चित्रपट पहायचो. त्याच्यासारखा फिट होऊन दाखवेन असा निश्चय मी केला आणि जिमला जाऊ लागलो. सलमानमुळेच मी आता फिट आहे.”

पहा व्हिडीओ-

Duplicate Salman Khan aka Azam Ansari detained after he was booked under sec 151 CrPC by Lucknow police. pic.twitter.com/DLuhkP9lXf

— Piyush Rai (@Benarasiyaa) May 8, 2022

आझमने यावेळी सलमानशी भेटण्याची इच्छा व्यक्त केली. “मला सलमान खानला भेटून त्याच्यासोबत एक व्हिडीओ करायचा आहे”, असं तो म्हणाला. आझम हा रिअल इस्टेटमध्ये काम करत असून इन्स्टाग्रामवर त्याचे एक लाख फॉलोअर्स आहेत. सलमानच्या विविध गाण्यांवर त्याने व्हिडीओ शूट करून सोशल मीडियावर पोस्ट केले आहेत.