Nivati Rocks: सिंधुदुर्गातील निवतीच्या खडकांतून पाण्याचा मोठा फवारा; अद्भुत दृश्याचा व्हिडीओ व्हायरल

कोरोना महामारी आणि लॉकडाउनमधील निर्बंधांमुळे जवळपास गेली दोन वर्षे लोकांना घरातच राहावं लागलं होतं. या दरम्यान काही मोजक्याच लोकांना इतर ठिकाणी जाता आलं, फिरता आलं. पण आता जवळपास सर्व निर्बंध हटवण्यात आले असून जनजीवन पूर्वपदावर येत आहे. आता लोक घराबाहेर पडून फिरायला जाऊ लागले आहेत, विविध ठिकाणांना भेट देऊ लागले आहेत. अशातच महाराष्ट्रातील सिंधुदुर्ग (Sindhudurg) जिल्ह्यातील एक व्हिडिओ सोशल मीडियावर व्हायरल होत आहे, ज्यामध्ये लोकांना एक अप्रतिम ठिकाण आणि दृश्य पाहायला मिळत आहे. (Nivati Rocks)

या ठिकाणाला ‘निवती खडक’ म्हणतात. बोटीवर बसलेल्या लोकांनी हा व्हिडीओ शूट केला आहे. या व्हिडीओमध्ये मोठ्या खडकांतून फवारांच्या रूपात पाणी बाहेर येत असल्याचं स्पष्टपणे दिसत आहे. RPG एंटरप्रायझेसचे अध्यक्ष हर्ष गोयंका यांनी हा व्हिडिओ रिट्विट केला असून तो आतापर्यंत 16,800 पेक्षा अधिक वेळा पाहिला गेला आहे. या व्हिडिओमध्ये हर्ष गोएंका यांना टॅग करत डॉ. मधु टेक चांदनी नावाच्या महिला ट्विटर युजरने लिहिलं की, “महाराष्ट्रातील सिंधुदुर्ग जिल्ह्यातील वेंगुर्ल्याच्या काठावर असलेल्या या जागेला ‘निवती रॉक्स’ म्हणतात. पाण्याच्या लाटेमुळे खडकांमधून हा फवारा तयारा होतो. हे अद्भुत आहे”

पहा व्हिडीओ-

@hvgoenka This spot is called “Nivati Rocks”, off the coast of Vengurla in Sindhudurg District, Maharashtra. Every wave that comes in creates this jet of water. Amazing India. pic.twitter.com/WhExlKoqPa

— DrMadhuTeckchandani (@msteckchandani) May 6, 2022

विशेष म्हणजे सिंधुदुर्ग किल्ला बांधल्यानंतर छत्रपती शिवाजी महाराजांच्या काळात निवती किल्ला बांधण्यात आला. महाराष्ट्र पर्यटन विभागाच्या वेबसाइटनुसार कार्ली खाडीपासून सागरी मार्गाचे रक्षण करण्यासाठी ते बांधण्यात आलं होतं. Condé Nast Traveller च्या मते, निवती खडक समुद्राच्या मध्यभागी आहेत आणि किल्ल्याच्या शिखरावरून समुद्राचं अद्भुत दृश्य दिसतं. त्या ठिकाणी एक लाइटहाऊससुद्धा आहे.