ऑनलाईन मोबाईल रिचार्जवर जादा चार्जस लागतायेत? प्लॅटफॉर्म फी कशी टाळायची ते जाणून घ्या

गुगल पे सारख्या UPI ॲप्स वापरून तुमचा मोबाईल रिचार्ज करताना तुमच्या लक्षात आले असेल की 100 रूपयांच्या मोबाईल रिचार्ज एकूण पेमेंट 103 रूपये किंवा 104 रूपये दाखवला जातो. हा फरक कोणत्याही टॅक्समुळे नाही, तर काही UPI ॲप्स वापरकर्त्यांकडून त्यांच्या प्लॅटफॉर्म वापरण्यासाठी आकारले जाणारे प्लॅटफॉर्म शुल्क आहे. वीज बिल, क्रेडिट कार्ड बिल किंवा इतर बिल भरतानाही असेच बदल दिसून येतात. कधीकधी आपण नेहमीच्या सवयी प्रमाणे घाईघाईने पैसे देतो, परंतु नंतर कळते की आपण जास्त पैसे दिले आहेत. ही रक्कम लहान वाटत असली तरी, जेव्हा तुम्ही रिचार्ज करता आणि दर महिन्याला अनेक वेळा तुमचे बिल भरता तेव्हा ती बरीच मोठी रक्कम बनते. तथापि काही सोप्या स्टेपसह तुम्ही हे अतिरिक्त शुल्क टाळू शकता. चला तर मग आजच्या लेखात आपण याबद्दल जाणून घेऊयात.

कंपनीच्या अधिकृत ॲपद्वारे पेमेंट करा

युपीआय सारख्या प्लॅटफॉर्मवरील ॲपचे शुल्क टाळण्याचा सर्वात सोपा मार्ग म्हणजे कंपनीच्या अधिकृत ॲप किंवा वेबसाइटद्वारे रिचार्ज करणे किंवा थेट पैसे देणे. जर तुमच्याकडे जिओ नंबर असेल तर MyJio ॲप वापरा. ​​थर्ड-पार्टी ॲपऐवजी थेट कंपनीच्या ॲपद्वारे पैसे देऊन तुम्हाला कोणतेही अतिरिक्त शुल्क आकारले जाणार नाही. शिवाय, असे केल्याने अनेकदा अतिरिक्त ऑफर किंवा सवलती मिळू शकतात.

इतर UPI ॲप्स देखील वापरून पहा

तुम्हाला जर एखाद्या विशिष्ट ॲपवर वारंवार प्लॅटफॉर्म शुल्क आकारत असाल, तर इतर UPI ॲप्स वापरून पहा. आजही, काही ॲप्स रिचार्ज किंवा बिल पेमेंटसाठी अतिरिक्त शुल्क आकारत नाहीत. योग्य प्लॅटफॉर्म निवडून, तुम्ही प्रत्येक व्यवहारावर काही पैसे वाचवू शकता.

तुमच्या बँकिंग ॲपद्वारे पेमेंट करा

आजही बरेच लोकं त्यांच्या फोनवरील बँकिंग ॲप्सकडे दुर्लक्ष करतात आणि वेगळे UPI ॲप्स इन्स्टॉल करतात. तथापि, बहुतेक बँक ॲप्स आता रिचार्ज आणि बिल पेमेंट वैशिष्ट्ये देतात आणि त्यांना कोणतेही प्लॅटफॉर्म शुल्क आकारले जात नाही.