Ajit Pawar : आंखों में कई ख्वाब, दिल में कई हसरतें.. मैं कैसे थक जाऊं… अजितदादांनी मोदींच्या उपस्थितीत मांडले राज्याचे ध्येय

अजित पवारांनी पंतप्रधानांच्या हस्ते मुंबईतील महत्त्वाच्या विकास प्रकल्पांच्या उद्घाटनाप्रसंगी मार्गदर्शन केले. या कार्यक्रमात राज्यपाल आचार्य देवव्रत, मुख्यमंत्री देवेंद्र फडणवीस, उपमुख्यमंत्री एकनाथ शिंदे, केंद्रीय मंत्री आणि इतर मान्यवर उपस्थित होते. पवारांनी महाराष्ट्राच्या वतीने पंतप्रधान नरेंद्र मोदींचे स्वागत केले आणि शिव-शाहू-फुले-आंबेडकरांना अभिवादन केले.

नवी मुंबई आंतरराष्ट्रीय विमानतळ, कोलाबा-वांद्रे-सिप्झ मेट्रो, मुंबई-1 ॲप आणि अल्प मुदतीचे रोजगारक्षम अभ्यासक्रम या चार महत्त्वाच्या प्रकल्पांमुळे मुंबई आणि महाराष्ट्राच्या विकासाला नवे पंख मिळणार असल्याचे पवारांनी नमूद केले. नवी मुंबई विमानतळामुळे आर्थिक विकास, व्यापार, पर्यटन आणि रोजगाराला चालना मिळेल, अशी आशा अजित पवारांनी व्यक्त केली.

मेट्रोमुळे प्रवास वेगवान, सोयीस्कर आणि पर्यावरणपूरक होईल, तर मुंबई-1 ॲप सार्वजनिक वाहतूक एकीकृत करेल. कौशल्य विकास कार्यक्रमांमुळे युवकांना रोजगारक्षम बनवण्यास मदत होईल. पंतप्रधान मोदींच्या नेतृत्वाखाली देशाने मोठी प्रगती साधली असून, विकसित भारत 2047 च्या दिशेने महाराष्ट्र अग्रस्थानी राहील असा विश्वास पवारांनी व्यक्त केला. राज्याला अतिवृष्टी आणि पुरामुळे झालेल्या नुकसानीसाठी केंद्र सरकारकडून मदतीची अपेक्षा अजित पवारांनी व्यक्त केली.