सावरकर प्रकरणानं वातावरण तापलं; भाजपचे 2 बडे नेते चांगलेच भडकले अन् दादांना थेट इशारा, प्रचाराच्या धामधुमीत युतीत जुंपली

महाराष्ट्र राजकारणात सध्या सत्ताधारी महायुतीमधील नेत्यांमध्येच शाब्दिक युद्ध सुरू असल्याचे चित्र आहे. भाजपचे नेते आशिष शेलार आणि चंद्रशेखर बावनकुळे यांनी राष्ट्रवादी काँग्रेसचे नेते अजित पवार यांना काही महत्त्वाच्या मुद्द्यांवरून थेट इशारा दिला आहे. मंत्री आशिष शेलार यांनी अजित पवारांना स्वातंत्र्यवीर सावरकरांचे विचार मान्य करावे लागतील असे म्हटले आहे. भाजप सावरकरांच्या विचारांचे अनुयायी असल्याने, अजित पवारांच्या पक्षालाही हे विचार स्वीकारणे बंधनकारक असल्याचे संकेत त्यांनी दिले. यावर, कुणीही जबरदस्तीने विचार लादू शकत नाही, कारण भारत देश संविधानावर चालतो, असे उत्तर सुरज चव्हाण यांनी दिले आहे.

दुसरीकडे, भाजपचे नेते चंद्रशेखर बावनकुळे यांनी अजित पवारांवर अप्रत्यक्षपणे ७० हजार कोटींच्या कथित सिंचन घोटाळ्यावरून निशाणा साधला. या प्रकरणाची सुनावणी अजूनही न्यायप्रविष्ट असून, न्यायालयाचा निकाल अजून लागलेला नाही, याकडे त्यांनी लक्ष वेधले. अजित पवारांनी मात्र, ज्यांनी माझ्यावर आरोप केले, त्यांच्यासोबतच मी सरकारमध्ये आहे, असे म्हणत स्वतःवरील आरोपांना उत्तर दिले. काँग्रेसचे प्रदेशाध्यक्ष हर्षवर्धन सपकाळ यांनी भाजपवर टीका करत, अजित पवारांना बाहेरचा रस्ता दाखवावा अशी मागणी केली आहे.