पेट्रोल-डिझेलच्या तुटवड्याबाबत पसरल्या अफवा; संभाजीनगरमध्ये इंधन भरण्यासाठी रांगा

छत्रपती संभाजीनगरमध्ये कालपासून अनेक पेट्रोल पंपांवर पेट्रोल आणि डिझेल भरण्यासाठी वाहनधारकांनी मोठी गर्दी केली आहे. शहरातील अनेक पंपांवर लांबच लांब रांगा लागल्याचे चित्र आहे. आखाती देशांमध्ये सुरू असलेल्या युद्धाच्या पार्श्वभूमीवर पेट्रोल आणि डिझेलचे भाव वाढतील, तसेच इंधनाचा तुटवडा निर्माण होईल, अशा अफवा सामाजिक माध्यमांवर पसरल्यामुळे ही गर्दी झाल्याचे दिसून येत आहे.

या अफवांमुळे नागरिक मोठ्या प्रमाणात इंधन खरेदी करत आहेत. सामान्यतः १००-२०० रुपयांचे पेट्रोल भरणारे दुचाकीस्वारही आपल्या वाहनांची टाकी पूर्ण भरताना दिसत आहेत. तथापि, पेट्रोल-डिझेल असोसिएशनच्या अध्यक्षांनी छत्रपती संभाजीनगरमध्ये इंधनाचा पुरेसा साठा उपलब्ध असल्याची माहिती दिली आहे. नागरिकांनी अशा अफवांवर विश्वास न ठेवण्याचे आणि अनावश्यक गर्दी टाळण्याचे आवाहन प्रशासनाने केले आहे.