Michael Rubin : ऑपरेशन सिंदूरमुळे पाकची अवस्था भेदरलेल्या कुत्र्यासारखी, शेपूट घालून पळापळ अन् युद्धबंदीची याचना…

पहलगाम हल्ल्याला प्रत्युत्तर देण्यासाठी भारताकडून ऑपरेशन सिंदूर राबवण्यात आलं. दरम्यान, भारताकडून पाकिस्तानवर करण्यात आलेल्या एअर स्ट्राईकनंतर पाकिस्तानची अवस्था एका घाबरलेल्या कुत्र्यासारखी झाली असल्याचे वक्तव्य अमेरिकेकडून करण्यात आलंय. इतकंच नाहीतर युद्धबंदीची याचना करण्यासाठी पाकिस्तान पायात शेपूट घालून धावत होता, असंही अमेरिकेने म्हटलं आहे. पाकिस्तानवर निशाणा साधताना अमेरिकेचे माजी संरक्षण अधिकारी मायकल रुबिन यांनी हे वक्तव्य केले आहे. यावेळी अमेरिकेचे माजी संरक्षण अधिकारी मायकल रुबीन यांनी ऑपरेशन सिंदूर अंतर्गत केलेल्या भारतीय लष्कराच्या कामगिरीचं कौतुक केले आहे तर अमेरिकेचे डोनाल्ड ट्रम्प यांच्यावर निशाणा साधला असल्याचे पाहायला मिळाले.

मायकल रुबिन यांनी असे म्हटले की, ‘ऑपरेशन सिंदूर’ अंतर्गत भारताने केलेल्या सर्जिकल स्ट्राईकनंतर पाकिस्तानला राजनैतिक आणि लष्करी आघाड्यांवर दारुण पराभव पत्करावा लागला आहे. एएनआयला दिलेल्या मुलाखतीत मायकल रुबिन यांनी पाकिस्तानच्या भूमिकेवर जोरदार टीका केली आणि भारताने केलेल्या लष्करी कारवाईचे कौतुक केले.