लालबागच्या राजाला विदेशी नोटांचा अनोखा हार, भाविकांमध्ये चर्चेला उधाण

मुंबईतील गणेशोत्सवाचा उत्साह शिगेला पोहोचला असून, लाडक्या लालबागच्या राजाच्या दर्शनासाठी भाविकांनी सकाळपासूनच मोठ्या प्रमाणात गर्दी केली आहे. मुंबईच्या या प्रसिद्ध गणपतीच्या दर्शनासाठी राज्यभरातूनच नव्हे, तर देशभरातून भाविक येत आहेत. गणेशोत्सवाच्या पहिल्याच दिवशी लालबागच्या राजाच्या चरणी भाविकांकडून भरघोस दान-धर्म करण्यात येत आहे.

या वर्षीच्या गणेशोत्सवात एका भाविकाने राजाला एक अनोखी आणि आकर्षक भेट अर्पण केली आहे. आज एका भक्ताने लालबागच्या राजाला परदेशी चलनाच्या नोटांपासून (डॉलरपासून) तयार केलेला एक सुंदर हार अर्पण केला. हा विशेष हार लालबागच्या राजाच्या गळ्यामध्ये परिधान केलेला असून, तो उपस्थितांचे आणि भाविकांचे लक्ष वेधून घेत आहे. गणेशोत्सवाच्या उत्साहात अशा प्रकारच्या अनोख्या भेटवस्तूंमुळे भक्तांची श्रद्धा आणि राजावरील प्रेम दिसून येते. अनेक भाविक आपल्या ऐपतीप्रमाणे आणि श्रद्धेने विविध वस्तू दान करत आहेत, त्यापैकी डॉलरचा हा हार निश्चितच चर्चेचा विषय ठरला आहे.