Mahayuti Rift: शिंदे यांची शहा यांच्याकडे तक्रार, तरीही हायकमांड रवींद्र चव्हाण यांच्या पाठीशी! महायुतीत धुसफूस?

उपमुख्यमंत्री एकनाथ शिंदे यांनी भाजपचे प्रदेशाध्यक्ष रवींद्र चव्हाण यांच्या विरोधात केंद्रीय गृहमंत्री अमित शहा यांच्याकडे तक्रार केल्याची माहिती आहे. कल्याण-डोंबिवलीसह विविध ठिकाणी शिवसेनेच्या (शिंदे गट) नेत्यांना भाजपकडून पक्षात घेतले जात असल्याची शिंदे यांची मुख्य तक्रार आहे. यामुळे महायुतीमध्ये वितुष्ट निर्माण होऊन आगामी निवडणुकांवर परिणाम होण्याची भीती शिंदेंनी व्यक्त केली. या भेटीनंतर, केंद्रीय नेतृत्वाने मात्र भाजप प्रदेशाध्यक्ष रवींद्र चव्हाण यांच्या पाठीशी भक्कमपणे उभे राहण्याचा निर्णय घेतल्याचे सूत्रांनी सांगितले.

“आरोप-प्रत्यारोप होतच राहतील, पक्षबांधणीचं काम सुरू ठेवा,” अशा सूचना चव्हाण यांना देण्यात आल्या आहेत. स्थानिक स्वराज्य संस्थांच्या निवडणुकीत भाजपला राज्यात पहिल्या क्रमांकाचा पक्ष बनवण्याचे उद्दिष्टही केंद्रीय नेतृत्वाने दिले आहे. दरम्यान, उद्धव ठाकरेंनी शिंदेंच्या दिल्ली दौऱ्यावरून “बाबा मला मारलं म्हणून दिल्लीला गेले” असे म्हणत टीका केली आहे, ज्यामुळे राजकीय वर्तुळात चर्चांना उधाण आले आहे. महायुतीतील अंतर्गत फोडाफोडीचा हा मुद्दा आता राष्ट्रीय स्तरावर पोहोचला आहे.