Congress | काँग्रेस कार्यालयात घुसलेल्या NCP कार्यकर्त्यांची पोलिसांकडून धरपकड

उपमुख्यमंत्री सुनेत्रा पवार यांच्याविषयी काँग्रेसने केलेल्या “गुंगी गुडिया” या टिप्पणीच्या निषेधार्थ काँग्रेस कार्यालयात आंदोलनासाठी घुसलेल्या राष्ट्रवादी काँग्रेस (अजित पवार गट)च्या कार्यकर्त्यांना पोलिसांनी ताब्यात घेतले आहे. आंदोलनादरम्यान कार्यकर्त्यांनी जोरदार घोषणाबाजी करत काँग्रेसच्या भूमिकेविरोधात तीव्र निषेध व्यक्त केला.

राष्ट्रवादी काँग्रेसचे कार्यकर्ते काँग्रेस कार्यालयात प्रवेश करून सोशल मीडियावर सुनेत्रा पवार यांच्याविषयी करण्यात आलेल्या वक्तव्याचा निषेध नोंदवत होते. यावेळी कार्यकर्त्यांनी संबंधित पोस्ट मागे घेण्याची आणि काँग्रेसकडून सार्वजनिक माफीची मागणी केली.

आंदोलन तीव्र होत असल्याचे लक्षात येताच पोलिसांनी तातडीने घटनास्थळी धाव घेत परिस्थिती नियंत्रणात आणली. यावेळी राष्ट्रवादी काँग्रेसच्या महिला कार्यकर्त्यांसह अनेक आंदोलनकर्त्यांना ताब्यात घेण्यात आले. पोलिसांनी त्यांना घटनास्थळावरून हटवत पुढील कारवाई सुरू केली.

दरम्यान, काँग्रेस कार्यालयात घडलेल्या या आंदोलनामुळे परिसरात काही काळ तणावाचे वातावरण निर्माण झाले होते. सुनेत्रा पवार यांच्यावरील टिप्पणीवरून सुरू झालेला राजकीय वाद आता आंदोलन आणि पोलिस कारवाईपर्यंत पोहोचला असून, या प्रकरणावर पुढे काँग्रेस आणि राष्ट्रवादी काँग्रेसकडून काय भूमिका घेतली जाते, याकडे राज्याच्या राजकीय वर्तुळाचे लक्ष लागले आहे.