Piyush Goyal Statement : आधी गोंधळ, नंतर स्पष्टीकरण! पीयूष गोयल यांच्या वक्तव्यानं काय घडलं?

केंद्रीय मंत्री पियुष गोयल यांच्या एका वक्तव्यामुळे अजित पवार यांच्या नेतृत्वाखालील राष्ट्रवादी काँग्रेसमध्ये तात्पुरता गोंधळ उडाला. गोयल यांनी प्रसारमाध्यमांशी बोलताना प्रफुल्ल पटेल यांची राष्ट्रवादीच्या राष्ट्रीय अध्यक्षपदी नियुक्ती झाल्याचा दावा केला. यामुळे राजकीय वर्तुळात आणि विशेषतः दादांच्या राष्ट्रवादीमध्ये लगेचच खळबळ माजली.

मात्र, गोयल यांच्या या दाव्यानंतर तात्काळ राष्ट्रवादी काँग्रेसचे प्रदेशाध्यक्ष सुनील तटकरे यांनी स्पष्टीकरण दिले की, असा कोणताही निर्णय झालेला नाही. स्वतः प्रफुल्ल पटेल यांनीही ट्वीट करून गोयल यांच्या वक्तव्याला निराधार असे संबोधले. त्यांनी सांगितले की, राष्ट्रीय अध्यक्षपदाबद्दलचा कोणताही निर्णय वरिष्ठ नेतृत्व, आमदार आणि पदाधिकाऱ्यांशी चर्चा करूनच घेतला जाईल.

या गोंधळानंतर पियुष गोयल यांनी आपण चुकीच्या माहितीच्या आधारे बोलल्याचे स्पष्टीकरण दिले. एका वरिष्ठ पत्रकाराने चुकीची माहिती दिल्याचे त्यांनी नमूद केले. राष्ट्रवादी काँग्रेस पक्ष उपमुख्यमंत्री सुनेत्रा पवार यांच्या नेतृत्वाखाली काम करत असून, चुकीच्या माहितीबद्दल त्यांनी खेद व्यक्त केला. अजित पवार गटातील नेत्यांनीही सुनेत्रा पवारच राष्ट्रीय अध्यक्ष असतील, अशी ठाम भूमिका घेतली आहे.