गोकुळ दूध संघावरून राजकारण तापलं! प्रवीण दरेकरांचा विरोधकांना जोरदार पलटवार

प्रवीण दरेकर यांनी गोकुळ दूध संघाच्या मुद्यावरून विरोधकांकडून होत असलेल्या आरोपांना जोरदार प्रत्युत्तर दिले आहे. सरकारचा कोणताही सहकार संस्था हस्तगत करण्याचा उद्देश नाही, तर लोकशाही मार्गाने निवडून आलेल्या संचालकांना कार्यभार सांभाळता यावा यासाठी निर्णय घेतले जात असल्याचे दरेकर यांनी स्पष्ट केले. दरेकर म्हणाले की, मुख्यमंत्र्यांनी या प्रकरणात अत्यंत संयमी भूमिका घेतली आहे. त्यांनी संबंधित नेत्यांना एकत्र बसून संस्थेच्या हितासाठी निर्णय घेण्याचे आवाहन केले होते. मात्र, विरोधकांना हा डेडलॉक कायम ठेवून गोकुळच्या माध्यमातून राजकीय दुकानदारी चालवायची होती, असा आरोप दरेकर यांनी केला.

सतेज पाटील यांनी “अमूल आणि मदर डेअरी” हे दोनच ब्रँड शिल्लक ठेवण्याचे षडयंत्र असल्याचा केलेला आरोपही दरेकर यांनी फेटाळून लावला. राज्यात अनेक दूध संघ आणि ब्रँड चांगल्या प्रकारे कार्यरत असून, सहकार चळवळीला धक्का लावण्याचा सरकारचा कोणताही मानस नसल्याचे त्यांनी अधोरेखित केले. दरेकर यांनी विरोधकांवर दुटप्पी भूमिका घेतल्याचा आरोप करत, सरकार सहकार क्षेत्राच्या विकासासाठी कटिबद्ध असल्याचे सांगितले.