.. म्हणून एकनाथ शिंदेंचा राजीनामा घ्या! सुषमा अंधारेंची मोठी मागणी

शिवसेना (उद्धव बाळासाहेब ठाकरे) पक्षाच्या नेत्या सुषमा अंधारे यांनी उपमुख्यमंत्री एकनाथ शिंदे यांच्या राजीनाम्याची मागणी केली आहे. उपमुख्यमंत्री शिंदे यांचे बंधू प्रकाश शिंदे यांच्यावर ड्रग्स संबंधाचे आरोप होत असून, या प्रकरणाची निष्पक्ष चौकशी व्हावी, अशी अंधारे यांची भूमिका आहे. अंधारे यांनी स्पष्ट केले की, प्रकाश शिंदे यांच्या रिसॉर्टमधून जेवण गेल्याचे स्थानिक आणि प्रसारमाध्यमे सांगत आहेत, तसेच पोलिसांच्या तपासातही ही बाब पुढे येत आहे. महाराष्ट्रातील 14 कोटी जनतेच्या भविष्याचा प्रश्न असल्याने, ही चौकशी प्रभावमुक्त होणे आवश्यक आहे. उपमुख्यमंत्री पदावर असताना तपासावर प्रभाव पडू शकतो, त्यामुळे त्यांनी राजीनामा द्यावा. राजीनामा दिल्यानंतर ते पुन्हा खुर्चीवर बसू शकतात, असेही अंधारे यांनी नमूद केले.

याच संदर्भात त्यांनी माणिकराव कोकाटे यांच्या राजीनाम्याचा विषयही उपस्थित केला. माणिकराव कोकाटे यांच्या अटकेबाबत प्रश्नचिन्ह उपस्थित करत, केवळ मंत्री असल्यामुळे त्यांच्यावर कारवाई झाली नाही का, अशी शंका त्यांनी व्यक्त केली. माणिकराव कोकाटे यांचा राजीनामा पक्षाने घेतला असला तरी, तो मुख्यमंत्री का मंजूर करत नाहीत, असा सवाल अंधारे यांनी केला. महापालिका निवडणुकीच्या पार्श्वभूमीवर राष्ट्रवादी काँग्रेसला लक्ष्य करून भाजपला फायदा मिळवण्याचा हा प्रयत्न असल्याचा आरोपही त्यांनी केला.