Sanjay Raut : जगणं झालंय छान कारण चोरला आमचा धनुष्यबाण, संजय राऊत यांचा सत्ताधाऱ्यांवर हल्लाबोल

ठाण्यात झालेल्या सभेत शिवसेनेचे नेते संजय राऊत यांनी सत्ताधारी पक्षांवर जोरदार हल्ला चढवला. ही लढाई निष्ठावान विरुद्ध बेईमान असल्याची घोषणा त्यांनी केली. महाराष्ट्राच्या राजकारणात उद्धव ठाकरे आणि राज ठाकरे यांच्या एकत्र येण्यामुळे एका नव्या पर्वाची सुरुवात झाली असून, हे वादळ सत्ताधाऱ्यांसाठी तडाखे देणारे ठरेल, असे राऊत यांनी नमूद केले. राऊत यांनी ठाणे महानगरपालिकेच्या आगामी निवडणुकीसाठी ठाणेकरांना आवाहन केले.

बाळासाहेब ठाकरे यांच्या निष्ठेचे बीज ठाण्यात अजूनही कायम असून, ठाण्याच्या महानगरपालिकेवर ठाकरे बंधूंचा म्हणजेच शिवसेना-मनसेचा भगवा फडकवण्याची जबाबदारी ठाणेकरांवर आहे, असे ते म्हणाले. मुख्यमंत्री देवेंद्र फडणवीस आणि एकनाथ शिंदे यांच्यावर थापा मारण्याचा आणि भ्रष्टाचाराचा आरोप करत, ठाणे महानगरपालिकेत सर्वाधिक टेंडरबाजी आणि कमिशनबाजी झाल्याचा दावा राऊत यांनी केला. वसई-विरारमध्ये मुख्यमंत्र्यांनी हिंदीत भाषण केल्याबद्दल राऊत यांनी नाराजी व्यक्त केली. मराठी मुलुखात मराठी भाषा सोडून हिंदीचा वापर करणे म्हणजे महाराष्ट्राच्या अखंडतेला धोका असल्याचे त्यांनी सांगितले. ठाकरे बंधूंची युती सत्ताधाऱ्यांचा संपूर्ण नायनाट करून महाराष्ट्रात एक नवीन पर्व सुरू करेपर्यंत एकत्र राहील, असा विश्वास त्यांनी व्यक्त केला.