भाजपने पराभवाची सवय लावून घ्यावी! विशाल पाटील यांची टीका

पश्चिम बंगालमध्ये शहरी नक्षलवाद सुरू असल्याची टीका भाजप नेते आशीष शेलार यांनी केली असताना, दुसरीकडे खासदार विशाल पाटील यांनी भाजपवर जोरदार निशाणा साधला आहे. भाजपने जिल्हा परिषद, विधानसभा आणि लोकसभा निवडणुकांमध्ये पराभवाची सवय लावून घ्यावी, असा खोचक सल्ला खासदार विशाल पाटील यांनी दिला आहे. जनतेने तुम्हाला नाकारले असून, आता त्यांनी दिलेला पराभव स्वीकारायला हवा, असे पाटील म्हणाले.

सांगली महापालिकेप्रमाणे जिल्हा परिषदेमध्ये परिस्थिती होणार नाही, असेही पाटील यांनी स्पष्ट केले. भाजपचे अस्तित्व केवळ मिरज आणि जत या दोन तालुक्यांपुरतेच मर्यादित आहे. जर आम्ही एकसंघपणे लढलो असतो, तर भाजप एका आकड्याच्या पुढे गेली नसती, असा दावाही पाटील यांनी केला. एवढा पराभूत झालेला पक्ष पुन्हा सत्तेत येण्यास इतका का इच्छुक आहे, हे कळत नाही, असे म्हणत त्यांनी भाजपच्या सत्तालोलुपतेवर टीका केली.

लोकांनी तुम्हाला जिल्हा परिषदेत नाकारले आहे, उद्या विधानसभेतही नाकारतील आणि लोकसभेतही नाकारतील. त्यामुळे पराभवाची सवय लावून घ्या, असा सल्ला त्यांनी भाजपला दिला. जनतेने तुम्हाला दिलेला पराभव स्वीकारा, असे आवाहन पाटील यांनी केले.