E85 Fuel Launch : रेग्युलर पेट्रोलपेक्षा 20 रुपये स्वस्त E85 फ्यूल लॉन्च, पेट्रोल-डिझेलच्या संकटात एक समाधान देणारी बातमी
E85 Fuel Launch : अमेरिका-इराणमधील तणावामुळे पेट्रोल-डिझेलच्या आयातीत मोठा अडथळा निर्माण झाला आहे. त्यामुळे पेट्रोल-डिझेलच्या किंमती वाढत चालल्या आहेत. या पार्श्वभूमीवर सरकारने आता E85 फ्यूल लॉन्च केलं आहे. रेग्युलर पेट्रोलपेक्षा 20 रुपयांनी स्वस्त असलेलं हे इंधन काय आहे, ते समजून घ्या.
E85 Petrol Price : देशात आता हाय-इथेनॉल फ्यूलची अधिकृत विक्री सुरु झाली आहे. हे एक मोठं पाऊल आहे. E85 ला पारंपारिक पेट्रोल-डिझेलला पर्यायी इंधन मानलं जात आहे. केंद्रीय पेट्रोलियम आणि नैसर्गिक वायू मंत्री हरदीप सिंह पुरी यांनी दिल्लीच्या पुसा रोडवरील इंडियन ऑइल आउटलेट येथे पहिल्या E85 फ्यूल स्टेशनचं उद्घाटन केलं. देशात पहिली फ्लेक्स फ्यूल कार सुद्धा लॉन्च झाली आहे. नवीन E85 इंधन पेट्रोलपेक्षा स्वस्त दरात मिळेल.
दिल्लीत E85 फ्यूलचा प्रति लीटर दर 82.12 रुपये आहे. विद्यमान E20 पेट्रोलच्या तुलनेत हे फ्यूल प्रति लीटर 20 रुपये स्वस्त आहे. पेट्रोल पंपावर वाहन चालकांचा गोंधळ उडू नये यासाठी E85 फ्यूलला वेगळं ब्रांडिंग आणि स्पेशल लेबलसह सादर केलं आहे. कमी किंमतीमुळे वाहन चालकांसाठी इंधनाचा हा पर्याय आकर्षक ठरु शकतो. E85 हाय-इथेनॉल फ्यूलसाठी तशा पद्धतीचं वाहन गरेजचं आहे. सध्या आशा वाहनांची संख्या कमी आहे.
हे इंधन आर्थिक आर्थिक दृष्ट्‍या परवडणारं का आहे ?
सध्या देशात E20 पेट्रोल मध्ये 20 टक्के इथेनॉल आणि 80 टक्के पेट्रोल असतं. E85 फ्यूल मध्ये 85 टक्के इथेनॉल आणि केवळ 15 टक्के पेट्रोल आहे. इथेनॉलच्या अधिक उपयोगामुळे पेट्रोलचा वापर कमी होईल आणि कच्चा तेलावरील अवलंबित्व सुद्ध घटेल. ऊस, मका आणि तांदळापासून इथेनॉलची निर्मिती केली जाते. म्हणून आर्थिक दृष्ट्‍या हे परवडणारं इंधन आहे.
सरकारची या इंधनासाठी किती स्टेशन्स उभारणार?
देशाची राजधानी दिल्लीत पुसा रोड आउटलेट येथे पहिलं E85 स्टेशन आहे. सरकारची या इंधनासाठी मोठी योजना आहे. सुरुवातीच्या टप्प्यात दिल्ली-एनसीआर आणि मुंबई-पुणे-नागपूर कॉरिडोरमध्ये 50 ते 100 E85 स्टेशन लावण्यात येतील. यावर्षाच्या अखेरपर्यंत 500 स्टेशन्सच नेटवर्क तयार करण्याचं लक्ष्य ठरवण्यात आलय. 2027 च्या अखेरपर्यंत देशातील प्रमुख शहरांमध्ये जवळपास 5000 पेक्षा अधिक E85 फ्यूल स्टेशन सुरु करण्याची सरकारची योजना आहे.
E85 फ्यूलसाठी कसं वाहन हवं?
E85 फ्यूल हे प्रत्येक वाहनासाठी नाही, हे लक्षात घेणं गरजेचं आहे. E85 कम्पलायंट इंजिन असलेल्या वाहनांमध्येच या फ्यूलचा वापर करता येईल. यासाठी विशेष डिझाइन केलेल्या कॅलिब्रेट फ्लेक्स-फ्यूल वाहनांची आवश्यकता आहे. भारतात सध्या काहीच फ्लेक्स-फ्यूल वाहन उपलब्ध आहेत.
