Gold-Silver Rate Today 06 March 2026 : अरे देवा ! युद्धाच्या भडक्याने सोनंही होरपळलं.. आजचा भाव किती ?
Gold-Silver Rate Today 06 March 2026 Latest News Updates in Marathi: काल MCX वर झालेल्या किरकोळ घसरणीनंतर, आज सोने आणि चांदीच्या किमतीत अचानक वाढ झाली आहे. आज 6 मार्च रोजी देशभरात सोन्याचे दर किती ते जाणून घेऊया .
Gold and Silver Rates on 6 March 2026 Updates : मध्य पूर्वेतील अमेरिका, इस्रायल आणि इराणमधील वाढत्या संघर्षामुळे, तणावामुळे जगभरात अशांतता असून त्याचा परिणाम सोनं आणि चांदीच्या बाजारातही दिसत आहे. दोन्ही धातूंच्या किमतीत सातत्याने चढउतार होत असून त्यामुळे मोठी खळबळ उडाली आहे. या तिन्ही देशांच्या संघर्षामुळे जगभरातील शेअर बाजार आणि कमोडिटी बाजारांची धडधड वाढली आहे. युद्धाच्या या आवाजात, गुंतवणूकदार त्यांचे पैसे सुरक्षित ठेवण्यासाठी पुन्हा त्याच जुन्या आणि विश्वासार्ह ठिकाणाकडे वळले आहेत, ज्याला ‘सेफ-हेवन’ म्हणजेच सोनं म्हणतात. याचाच परिणाम म्हणजे आज, 6 मार्च 2026 रोजी दिसून आला असून सोने आणि चांदीच्या किमतीत पुन्हा एकदा मोठी वाढ झाली आहे.
सोन्या-चांदीचे दर किती ?
काल MCX वर झालेल्या किरकोळ घसरणीनंतर, आज मात्र सोनं-चांदीच्या दरांनी उसळी मारली आहे. मल्टी कमोडिटी एक्सचेंज (MCX) वर सकाळी 9 वाजेपर्यंत,सोन्याच्या भावात 1302 रुपयांची वाढ झाली. या मोठ्या वाढीसह, 10 ग्रॅम सोन्याच्या किमतीने 1 लाख 60 , 950 रुपयांचा नवा उच्चांक गाठला आहे. तर दुसरीकडे चांदीचीही तीच हालत असून त्यात आणखी मोठी वाढ दिसून आली आहे. चांदी तर सोन्यापेक्षाही वेगाने वाढत आहे. चांदीच्या किमती 5631 रुपयांनी वाढून 2 लाख 67 हजार 822 रुपये प्रति किलो या दरांवर पोहोचल्या आहेत. त्यामुळे,ही गुंतवणूक करण्याची योग्य वेळ आहे का, असा प्रश्न सोने आणि चांदी खरेदीदार आणि गुंतवणूकदारांच्या मनात आहे. युद्धाच्या आगीत सोने-चांदी अधिक महाग होईल की त्याची चमक कमी होईल आणि येत्या काळात सोने-चांदी स्वस्त होईल?
परदेशी बाजारपेठेतही खळबळ
मात्र या दोन धातूंच्या दरातील तेजी केवळ भारतीय बाजारपेठेपुरती मर्यादित नाही. सुरुवातीच्या आशियाई बाजारपेठांमध्ये आणि आंतरराष्ट्रीय व्यासपीठांवरही सोन्याची चमक वाढली आहे. जागतिक COMEX वर आज सोन्याने 1.16 टक्क्यांनी वाढ झाली आणि प्रति औंस 5,137.70 डॉलर्सचा जादुई टप्पा ओलांडला. चांदीही यात मागे नाही; त्यात 2.27 टक्क्यांची लक्षणीय वाढ झाली आहे, जी प्रति औंस 84.06 डॉलर्सवर व्यवहार करत आहे. सोन्याची जागतिक मागणी सध्या शिखरावर आहे हेच परदेशी बाजारपेठेतील या कलावरन स्पष्ट होतं.
कालच मिळाला होता दिलासा
सराफा बाजाराचा हा सध्याचा ट्रेंड आणखी धक्कादायक आहे कारण एक दिवस आधीच, म्हणजे गुरुवारी, चित्र पूर्णपणे उलट होते. इंडिया बुलियन ज्वेलर्स असोसिएशन (IBJA) च्या आकडेवारीनुसार, काल सराफा बाजारात जोरदार विक्री झाली. 24 कॅरेट सोन्याची किंमत 1,962 रुपयांनी घसरून 1,60,586 रुपये प्रति 10 ग्रॅम झाली. त्याचप्रमाणे 22 कॅरेट सोने 1,47,097 रुपये आणि 18 कॅरेट सोने 1,20,440 रुपये प्रति 10 ग्रॅम दराने विकलं गेले. काल चांदीला सर्वात मोठा फटका बसला, एका दिवसात 7,135 रुपयांनी प्रति किलोग्रॅम घसरण झाली आणि ती 2,64,212 रुपयांवर बंद झाली. काल एमसीएक्सवर सोने 0.15% आणि चांदी 0.12% ने घसरून बंद झाली.
