जुना वाद पुन्हा उफाळून आला, मित्रासोबत बसला असतानाच तरुणाचा काटा काढला !
पुन्हा एकदा हत्येच्या घटनेने नागपूर हादरले आहे. हत्यासत्र थांबण्याचे नावच घेताना दिसत नाही. काही ना काही कारणातून हत्यााकांडाच्या घटना घडत आहेत.
नागपूर : उपराजधानीत हत्येचे सत्र थांबण्याचे नावच घेताना दिसत नाही. रोज या ना त्या कारणातून हत्येच्या घटना घडत आहेत. क्षुल्लक कारणातून नात्यांचाही विसर पडलेला दिसतो. आज पुन्हा एका हत्याकांडाने नागपूर हादरले आहे. जुन्या वादातून 20 तरुणाने 40 वर्षाच्या इसमाची हत्या केल्याची धक्कादायक घटना नागपुरमधील यशोधरा नगरमध्ये घडली आहे. भारत उके असे मयत व्यक्तीचे नाव आहे, रुपेश गडकरी असे आरोपीचे नाव आहे. याप्रकरणी यशोधरा नगर पोलीस ठाण्यात गुन्हा दाखल करण्यात आला आहे. पोलिसांनी आरोपीला अटक केली आहे.
जुना वाद उफाळून आला अन्…
नागपूरच्या यशोधरा नगर पोलीस स्टेशन हद्दीत पिवळी नदी परिसरात भारत आणि रुपेश राहतात. दोघेही खाजगी कंपनीत काम करत होते. दोघांमध्ये काही दिवसांपूर्वी काही कारणातून वाद झाला होता. मयत भारत हा काल रात्री आपल्या मित्रासोबत परिसरात बसला होता. यावेळी आरोपी रुपेश तेथे आला. रुपेशने काही कळायच्या आत भारतवर चाकूने हल्ला केला. यात भारतचा जागीच मृत्यू झाला. भररस्त्यात घडलेल्या या घटनेमुळे सर्वच हादरुन गेले.
पोलिसांकडून आरोपीची कसून चौकशी सुरु
घटनेची माहिती मिळताच यशोधरा नगर पोलिसांनी घटनास्थळी धाव घेत मृतेदह ताब्यात घेतला. पोलिसांनी घटनास्थळाचा पंचनामा करत मृतदेह शवविच्छेदनासाठी रुग्णालयात पाठवला. यानंतर काही तासाच पोलिसांनी आरोपीला बेड्या ठोकल्या आहेत. दोघांमध्ये नेमका कोणत्या कारणातून वाद होता, याबाबत पोलीस आरोपीची चौकशी करत आहेत. चौकशीअंतीच सर्व सत्य उघड होईल.
