Pandharpur Bike Theft : सात जिल्ह्यातील विविध कंपनीच्या बाईक चोरणाऱ्या टोळीला अटक, आरोपींची न्यायालयीन कोठडीत रवानगी

पंढरपूर : सोलापूर, कोल्हापूर, पुणे, बीड, अहमदनगर अशा सात जिल्ह्यातून वेगवेगळ्या कंपनीच्या 64 मोटरसायकली (Bikes) चोरणाऱ्या टोळीच्या पंढरपूर शहर पोलिसांनी मुसक्या आवळल्या आहेत. मोटारसायकल चोरणाऱ्या आठ आरोपींना अटक (Arrest) केली आहे. सर्व आरोपींची न्यायालयीन कोठडी (Judicial Custody)त रवानगी करण्यात आली आहे. चोरी केलेल्या दुचाकींची किंमत 21 लाख 30 हजार रुपये असल्याची माहिती जिल्हा पोलिस अधिक्षक तेजस्वी सातपुते यांनी दिली. पोलीस याप्रकरणी पुढील कारवाई करत असून, आरोपींनी आतापर्यंत किती बाईक चोरल्या आहेत याचा पोलीस तपास करत आहेत.

पोलिसांनी सापळा रचून आरोपींना अटक केले

पंढरपूर शहर व परिसरात मोठ्या प्रमाणात दुचाकी चोरीला जात आहेत. याबाबत तपास करण्यासाठी उपविभागीय पोलीस अधिकारी विक्रम कदम यांनी तीन पथकांची नियुक्ती केली होती. या पथकास टाकळी येथे चोरीची मोटर सायकल विक्री करण्यासाठी काही जण येणार असल्याची माहिती मिळाली. त्यानुसार पोलिसांनी सदर परिसरात सापळा रचून आरोपीस अटक केली आहे. यावेळी आरोपीची कसून चौकशी केली असता त्याने आपण साथीदाराच्या मदतीने पंढरपूर शहर व परिसर तसेच सांगली, कोल्हापूर, सातारा, पुणे, अहमदनगर आणि बीड जिल्ह्यातून दुचाकी चोरल्याची माहिती दिली. याप्रकरणी विशाल सिंह, राजपूत प्रशांत भोसले, आकाश खिलारे, वैभव लवटे, लखन पडळकर, संकेत शिंदे, दीपक हाके आणि प्रदीप शेळके या आठ आरोपींना अटक करण्यात आली असल्याची माहिती दिली. (A gang who stole bikes from various companies in seven districts was arrested)