विनेश फोगाटबद्दल लिहिताना मर्यादा सोडली, एफआयआर दाखल; पोलीस ठाण्यातच महिलांचा मोठा हंगामा

प्रसिद्ध कुस्तीपटू विनेश फोगाट ऑलिम्पिकच्या अंतिम सामन्यात अपात्र ठरली. त्यामुळे तिला सुवर्णपदक मिळू शकलं नाही. त्यानंतर तिने कुस्तीतून संन्यास घेत असल्याची घोषणाही केली. पण उत्तर प्रदेशातील अलिगडमध्ये विशाल नावाच्या एका तरुणाने त्याच्या फेसबुकवरून विनेश विरुद्ध अत्यंत खालच्या भाषेत पोस्ट केली. पोस्ट करताना त्याने मर्यादाच सोडली. त्यामुळे जाट समाज आणि समाजावादी पार्टीच्या कार्यकर्त्यांनी पोलीस ठाण्यात येऊन जोरदार हंगामा केला. या गोंधळामुळे क्वार्सी पोलीस ठाण्यात संबंधित तरुणाविरोधात एफआयआर दाखल करण्यात आला आहे.

काल 8 ऑगस्ट रोजी अलिगडच्या क्वार्सी पोलीस ठाण्यात एफआयआर दाखल करण्यात आला आहे. विनेश फोगाट हिच्या विरोधात आपत्तीजनक मजकूर फेसबुकवर लिहिण्यात आला होता. त्याची आम्ही दखल घेतली असून आयटी कलमांच्या अंतर्गत गुन्हा दाखल केला आहे. सर्व तांत्रिक पुरावे गोळा करून पुढील कायदेशीर कार्यवाही करण्यात येणार आहे, असं क्वार्सी पोलीस ठाण्याचे एसीपी अमृत जैन यांनी सांगितलं.

दबाव आला अन्…

कुस्तीपटू विनेश फोगाट हिला पॅरिस ऑलिम्पिकमध्ये 100 ग्रॅम वजन अधिक भरल्याने अंतिम सामन्यातून अपात्र घोषित करण्यात आलं होतं. त्यानंतर विशाल वार्ष्णेय नावाच्या एका यूजर्सने फेसबुक पोस्टवर आपत्तीजनक कमेंट केली होती. ही तक्रार मिळाल्यानंतर पोलिसांनी त्याची गंभीर दखल घेतली. पोलिसांनी विशालवर एफआयआर दाखल केला. जाट समाजातील लोकांनी पोलीस ठाण्यात येऊन गोंधळ घातला. आरोपीवर गुन्हा दाखल करण्याची मागणी केली. त्यानंतर पोलिसांनी गुन्हा दाखल केला.

सर्वांनाच धक्का

पॅरिस ऑलिम्पिकमध्ये अंतिम सामन्यात पोहोचूनही केवळ वजन वाढल्यामुळे विनेश फोगाट हिला अपात्र ठरवण्यात आल्याने प्रत्येकजण आश्चर्यचकीत झाला आहे. कुस्ती संघ आणि राजकीय पक्षांनी त्यावर नाराजी व्यक्त केली आहे. देशभरातील लोकही नाराज झाले आहेत. स्वत: विनेश फोगाट ही सुद्धा प्रचंड नाराज झाली होती. तिला नैराश्य आलं होतं. त्यामुळे तिला प्रोत्साहन देण्यासाठी लोक तिच्या बाजूने पोस्ट करत आहेत. असं असतानाच या तरुणाने अत्यंत खालच्या पातळीवर जाऊन फोगाटबद्दल फेसबुकवर लिहिल्याने त्याच्याविरोधात समाजवादी पार्टी आणि जाट समाजाने प्रचंड संताप व्यक्त करत निषेध नोंदवला आहे.