बँकेत नवीन खाते उघडताना सावधान, नवीन खाते उघडताच…

डोंबिवली : डोंबिवलीत ऑनलाईन फसवणुकीची धक्कादायक घटना उघडकीस आली आहे. एका व्यक्तीच्या बँक खात्यावरील मोबाईल नंबर आणि फोटो बदलून खात्यातून लाखो रुपयांची उलाढाल केल्याचे उघड झाले आहे. याप्रकरणी मानपाडा पोलीस ठाण्यात दोन जणांविरोधात गुन्हा दाखल करण्यात आला आहे. मानपाडा पोलीस पुढील तपास करत आहेत. चांदणी सिंह आणि मोहित लालवाणी अशी आरोपींची नावे आहेत. आरोपी ऑनलाईन खेळाच्या पैशाचा गैरवापर करण्यासाठी या बँक खात्यांचा वापर करायचे. याप्रकरणी पोलीस अधिक तपास करत आहेत. आरोपींनी आतापर्यंत अशा किती खात्यात अशी फसवणूक केली आहे, याची चौकशी पोलीस करत आहेत.

ऑनलाईन खेळाच्या माध्यमातून फसवणूक

डोंबिवलीतील गोळवली गावातील धीरेश रघुनाथ पाटील यांनी आयसीआयसीआय बँकेत नवीन खाते उघडले होते. त्यांच्या नवीन खात्यावरील मोबाईल नंबर आणि फोटो बदलण्यात आला होता. यानंतर ऑनलाईन खेळांच्या माध्यमातून चांदणी सिंह, मोहित लालवाणी नावाच्या दोन आरोपींनी ऑनलाईन खेळाच्या माध्यमातून परिसरातील अनेक लोकांची लाखो रुपयांची उलाढाल त्या खात्यांमधून केली.

बँकेत गेल्यानंतर तक्रारदाराला सर्व प्रकार कळताच धक्काच बसला

याप्रकरणी तक्रारदार धीरेश पाटील यांना हा प्रकार समजताच त्यांनी बँकेतून या प्रकाराची माहिती घेतली. त्यावेळी त्यांना आपल्या आणि इतरांच्या खात्यांमधून अशाप्रकारे लाखो रुपयांची हेराफेरी झाल्याचे समजले. त्यानंतर धीरेश यांनी मानपाडा पोलीस ठाण्यात धाव घेत दोन जणांविरुद्ध गुन्हा दाखल केला आहे. पोलीस अधिक तपास करत आहेत. दरम्यान, बँक खात्यावरील तपशील बदलून पैसे वळते करण्याच्या कामात बँकेतील कोणत्या कर्मचाऱ्याचा सहभाग आहे का याचाही पोलीस तपास करत आहेत.