Beed Doctor Beaten : डॉक्टर दाम्पत्याला धक्काबुक्की करत मारहाण, व्हिडिओ सोशल मीडियावर व्हायरल

बीड : भिशीच्या पैशाच्या वादातून परळीमध्ये एका डॉक्टर दाम्पत्याला त्यांच्या हॉस्पिटसमोरच मारहाण आणि धक्काबुक्की केल्याची खळबळजनक घटना उघडकीस आली आहे. आरोपींनी यावेळी डॉक्टरच्या पत्नीचा विनयभंगही केला. परळी येथील नामांकित डॉक्टर दाम्पत्याच्या मारहाणीचा व्हिडिओ व्हायरल झाला आहे. व्हिडिओ समोर आल्यानंतर आणि डॉक्टरांच्या तक्रारीवरून परळी पोलीस स्टेशनमध्ये आरोपींविरोधात गुन्हा दाखल करण्यात आला आहे. डॉक्टरांच्या ओळखीच्याच व्यक्तींकडून आणि भाडोत्री लोकांकडून ही मारहाण झाल्याचा डॉक्टरांचा आरोप आहे. मारहाणीत डॉक्टरांचे दात पडले आहेत.

डॉक्टर दाम्पत्याने 7 लाख 20 हजार भिशीमार्फत घेतले होते

परळी शहरातील विद्यानगर भागात राहणारे डॉक्टर शिवकांत अंदुरे यांचे नाथ रोडवरील भागवत मंगल कार्यालय शेजारी आयुर्वेदिक हॉस्पिटल आहे. काही वर्षांपूर्वी अंदुरे यांनी जीवन फडकरी यांच्याकडून भिशीमार्फत सात लाख वीस हजार रुपये घेतले होते.

मात्र फडकरी याने याचे चक्री व्याजदर करत एक कोटी 26 लाख रुपये लावत अंदुरे यांना मानसिक त्रास द्यायला सुरू केले होते. तसेच त्यांच्या हॉस्पिटलवर कब्जा देखील केला होता. मात्र दोन आठवड्यापूर्वी अंदुरे यांनी आपले हॉस्पिटल ताब्यात घेत परत एकदा सुरू केले होते.

पैशाच्या वादातून हॉस्पिटलसमोर डॉक्टर दाम्पत्याला मारहाण

मात्र 20 जानेवारी रोजी 11 ते 12 च्या दरम्यान जीवन फडकरी आणि अभय बळवंत हे इतर भाडोत्री गुंड महिला यांनी अंदुरे यांच्या हॉस्पिटलमध्ये शिरत त्यांना आणि त्यांच्या पत्नीस शिवीगाळ करत मारहाण केली.

तसेच हॉस्पिटलच्या बाहेर वंदना अंदुरे आणि शिवकांत अंदुरे यांना जमावासमोर मारहाण करत वंदना अंदुरे यांचे अपहरण करण्याचा प्रयत्न केला. मात्र हॉस्पिटलसमोर उपस्थित झालेल्या जमावामुळे वंदना यांचे अपहरण जीवन फडकरी आणि त्यांच्या साथीदारांना करता आले नाही. तसेच फडकरी यांनी डॉ. शिवकांत अंदुरे यांना लाथा बुक्क्यांनी मारहाण करत त्यांचे दात पाडले.

परळी पोलीस ठाण्यात गुन्हा दाखल

या प्रकरणी परळी शहर पोलीस ठाण्यात वंदना शिवकांत अंदुरे यांच्या फिर्यादीवरून परळी शहर पोलीस ठाण्यात गुन्हा दाखल करण्यात आला आहे. याप्रकरणी पुढील तपास परळी शहर पोलीस स्टेशनचे सहायक पोलीस निरीक्षक भार्गव सपकाळ हे करीत आहेत.