Kalyan Crime : नवरीला मेकअप महागात पडला, मेकअप आर्टिस्टच दागिने घेऊन पसार झाल्या !
डोंबिवलीत चोरीची अनोखी घटना उघडकीस आली आहे. या घटनेमुळे एकच खळबळ उडाली. या घटनेवरुन नक्की कुणावर विश्वास ठेवावा हा प्रश्न निर्माण झाला आहे.
डोंबिवली / 21 ऑगस्ट 2023 : डोंबिवलीत चोरीच्या घटना थांबण्याचे नावच घेत नाहीत. गर्दीचा फायदा घेत, घरी कुणी नसल्याचा फायदा घेत चोरीच्या घटना वाढत असतानाच आता चोरीची अनोखी घटना उघडकीस आली आहे. साखरपुड्यासाठी नवरीचा मेकअप करायला आलेल्या मेकअप आर्टिस्टनेच नवरीचे दागिने चोरल्याची घटना उघडकीस आली आहे. याप्रकरणी रामनगर पोलीस ठाण्यात चोरीचा गुन्हा दाखल करण्यात आला आहे. पोलिसांनी दोन्ही आरोपींना अटक केली आहे. कल्पना राठोड आणि अंकिता परब उर्फ अंकिता इंगळे अशी अटक आरोपींची नावे आहेत. पोलिसांनी आरोपींकडून चोरीला गेलेले दागिने हस्तगत केले आहेत.
काय आहे प्रकरण?
मुलुंड परिसरात राहणाऱ्या तरुणीचा 15 ऑगस्ट रोजी डोंबिवली पूर्वेकडील गार्डा सर्कल येथील हॉलमध्ये साखरपुडा आयोजित करण्यात आला होता. यासाठी तरुणीने आपल्या ओळखीतल्या मेकअप आर्टिस्टला बोलावले होते. तरुणीचा मेकअप झाल्यानंतर मॅचिंग ज्वेलरी घालण्यासाठी तरुणीने सोन्याची चैन आणि कानातले काढून पर्समध्ये ठेवले. यावेळी हातचलाखीने मेकअप आर्टिस्टने ही पर्स उचलून पोबारा केला.
नातेवाईकांना वेळीच लक्षात आल्याने आरोपींना अटक
दागिने चोरी झाल्याचे नातेवाईकांना वेळीच लक्षात आले. नातेवाईकांनी तात्काळ रामनगर पोलीस ठाण्यात तक्रार दाखल केली. पोलिसांनी हॉलमधील सीसीटीव्ही तपासले असता दोन महिला संशयितरित्या पळताना दिसल्या. पोलिसांनी महिलांचा पाठलाग करत धावडी परिसरातून महिलांना ताब्यात घेतले. महिलांकडून चोरी केलेला मुद्देमाल जप्त केला आहे. या घटनेमुळे परिसरात एकच खळबळ उडाली आहे.
