वाढीव व्याजाचे आमिष दाखवत करोडोची फसवणूक, बंटी-बबली विरोधात गुन्हा दाखल
वाढीव व्याजाचे आमिष दाखवत आरोपींनी गुंतवणूक करण्यास नागरिकांना भाग पाडले. मग काही महिने व्याजाचे पैसे दिले. नंतर व्याजाचे पैसेही दिले नाहीत की गुंतवलेली रक्कमही दिली नाही.
डोंबिवली : वाढीव व्याजदराचे आमिष दाखवत गुंतवणूकदारांची करोडोची फसवणूक केल्याची घटना डोंबिवलीत उघडकीस आली आहे. याप्रकरणी बंटी-बबली दाम्पत्याविरोधात विष्णुनगर पोलीस ठाण्यात गुन्हा दाखल करण्यात आला आहे. या दाम्पत्याने 17 गुंतवणूकदारांची 2 कोटी 50 लाख रुपयांची फसवणूक करण्यात आली आहे. याबाबत विष्णुनगर पोलीस अधिक तपास करत आहेत. आरोपींची एमएमव्ही कन्सलटन्ट मेघा इंडिया नावाची कंपनी आहे. या कंपनीत गुंतवणूक करण्यास सांगत आरोपींनी गुंतवणूकदारांची फसवणूक केली. अमोल कृष्णा डोंगरीकर आणि अनन्या अमोल डोंगरीकर अशी आरोपी जोडप्यांची नावे आहेत.
वाढीव व्याजाच्या आमिषाला बळी पडत करोडो गुंतवले
एमएमव्ही कन्सलटन्ट मेघा इंडिया या कंपनीत 50 हजार ते 40 लाख रुपयांपर्यंत रकमा गुंतवल्यास वाढीव व्याज मिळेल असे आमिष आरोपींनी गुंतवणूकदारांना दाखवले. या आमिषाला बळी पडत गेल्या पाच वर्षाच्या कालावधीत गुंतवणूकदारांनी आरोपींच्या कंपनीत करोडोची गुंतवणूक केली. चेंबूर येथील सेवानिवृत्त गुंतवणूकदाराच्या तक्रारीवरुन पोलिसात गुन्हा दाखल केला.
एका गुंतवणूकदाराच्या तक्रारीवरुन गुन्हा दाखल
चेंबूर येथील सेवानिवृत्त ओमप्रकाश सरोया यांनाही वाढीव व्याजाचे आमिष दाखवले होते. डोंगरीकर दाम्पत्याने दरमहा 25 हजार रुपये व्याज देण्याचे आमिष दाखवत 25 लाख रुपये गुंतवण्यास सांगितले. त्यानुसार सरोया यांनी आरोपींच्या कंपनीत 25 लाख रुपये गुंतवले. सुरवातीला काही महिने ठरल्याप्रमाणे 25 हजार रुपये व्याज खात्यात येत होते. त्यानंतर व्याज येणे बंद झाले.
यानंतर सोरया यांनी दाम्पत्याकडे पैसे परत करण्यासाठी तगादा लावला. मात्र दाम्पत्य पैसे परत करण्यास टाळाटाळ करत होते. यानंतर सोरया यांनी थेट पोलीस ठाणे गाठले आणि डोंगरीकर दाम्पत्याविरोधात तक्रार दाखल केली. पोलिसांनी फसवणुकीचा गुन्हा दाखल करत तपास सुरु केला. पोलीस तपासात आणखी 13 लोकांची अशा प्रकारे फसवणूक झाल्याचे निष्पन्न झाले.
