‘हे देवा, मला माफ कर, मी तुझ्या देवळात….’ मध्य प्रदेशातील चोराची चिट्ठी चर्चेत
देवळात चोरी केल्यानंतर चोरासोबत नेमकं काय घडलं? चोरानं चिट्ठीत लिहिलेला मजकूर वाचून सगळेच चकीत
मध्य प्रदेश : चोरीची एक अजब घटना समोर आली आहे. एका चोराने (Temple Thief) मंदिरातील मौल्यवान सामानाची चोरी केली. पण चोरीच्या काही दिवसांनी चोराने स्वतःच चोरीचं (Madhya Pradesh Crime News) सगळं सामान पुन्हा मंदिरात परत केलं आहे. इतकंच नव्हे तर एक चिट्ठीही चोराने लिहिली. या चिट्ठीत (Letter of Theft) त्याने चोरलेलं सगळं सामान परत का केलं, याचं कारणही लिहिलंय.
मध्य प्रदेशच्या बालाघाट इथं असलेल्या एका जैन मंदिरात चोरीची घटना घडली होती. 24 ऑक्टोबर रोजी घडलेल्या चोरीच्या घटनेमुळे एकच खळबळ उडालेली. या चोरीप्रकरणी पोलिसांत तक्रारही दाखल करण्यात आली होती. जैन मंदिरातील चोरीप्रकरणाचा तपास सुरु होता. पण चोराला अटक करण्याआधी खुद्द चोरानेच सगळं चोरी केलेलं सामानं परत आणून दिलंय.
चोरीच्या सामानासोबत चोराने एक चिट्ठी लिहिली होती. ही चिट्ठी आता चर्चेत आली आहे. जैन मंदिरात चोरी केल्यामुळे मला फार भोगावं लागलं, असं चोराने चिट्ठीमध्ये म्हटलंय. चोरी केल्याबाबत, ‘देवा मला माफ कर, मी चोरीचं सामान आता परत करतो आहे’, असंही त्याने लिहिलंय.
‘सगळं चोरीचं सामान मी ठेवून जातो आहे. ज्याला हे सामान सापडेल, त्याने जैन मंदिरात द्यावं’, अशी विनंतीही त्याने चिट्ठी लिहून केली होती. ही चिट्ठी लिहिणारा आणि चोरीचं सामान परत आणणार कोण होता, हे मात्र कळू शकलेलं नाही.
चोरी केलेलं देवळातील सामान चोराला परत का आणून द्यावंसं वाटलं आणि त्याचं मनपरिवर्तन नेमकं कशामुळे झाले, यावरुन चर्चांना उधाण आलंय. एका कुटुंबाला मंदिराचा बाहेर एक बॅग आढळली होती. ज्यात चोरी केलेलं सामान आणि चोराने लिहिलेली ही अजब चिट्ठी आढळलीय.
दरम्यान, चोरीचं सामान पुन्हा मंदिराच्या आवारत सापडल्यामुळे मंदिर प्रशासनाच्या लोकांनी आनंद व्यक्त केला आहे. तर दुसरीकडे पोलिसांनाही याप्रकरणी माहिती देण्यात आली आहे. चोरी झालेलं सामान आणि परत चोराने केलेल्या बाबी या सगळ्याची तपासणी आता केली जाते आहे. यात कोणती गोष्ट पुन्हा गहाळ तर झालेली नाही ना, याचाही तपास पोलीस करत आहेत.
