चलो अॅपचा पास काढून मुंबई फिरायचे, बसमध्ये प्रवाशांचे खिसे कापायचे; पोलिसांनी ‘अशा’ आवळल्या मुसक्या

मुंबई : बेस्टच्या चलो अॅपवर बसचा पास काढायचे आणि मुंबईत सर्वत्र बसने प्रवास करत प्रवाशांचे खिसे कापणाऱ्या टोळक्याच्या मुसक्या आवळण्यास मुंबई गुन्हे शाखेला (Crime branch arrested thief gang) यश आले आहे. मुंबई गुन्हे शाखा युनिट 12 च्या पथकाने ही कारवाई करत 5 आरोपींना अटक केली आहे. पोलिसांनी आरोपींकडून बेस्ट बसचे 4 “चलो अॅप” पास (Chalo app pass) आणि 2 कटर (Two Cutter Seized) जप्त केले आहेत.

गु्प्त माहितीच्या आधारे पोलिसांनी रचला सापळा

पोलीस निरीक्षक विलास भोसले यांनी दिलेल्या माहितीनुसार, बोरीवली पूर्व ओंकारेश्वर बस स्थानकाजवळ एका टोळीचे काही लोक खिसे कापण्यासाठी येत असल्याची माहिती युनिटला मिळाली होती. मिळालेल्या माहितीनुसार, गुन्हे शाखेच्या पथकाने परिसरात सापळा रचला.

नमूद आरोपी ओंकारेश्वर बस स्थानकाजवळ येताच आधीच सापळा लावून बसलेल्या पोलिसांची आरोपींना चाहूल लागली. यामुळे सर्व आरोपी तेथून पळून जाऊ लागले. मात्र पोलिसांनी शिताफीने पाठलाग करत सर्वांना पकडले.

आरोपींकडून गुन्ह्याची कबुली

पोलिसांनी आरोपींची झडती घेतली असता त्यांच्याकडे दोन फोल्डींग कटर, चार मोबाईल आणि चार चलो अॅपचे पास आढळून आले. आरोपींची चौकशी केली असता त्यांनी बसमध्ये मुंबईभर फिरायचे आणि लोकांच्या खिशातील पैसे चोरायचे, असे कबुल केले.

राजाराम रामदास पाटील, महादेव बसंत माने, अब्दुल कादर शाह, मोहम्मद रफिक वकील शेख, संजय प्रभाकर त्र्यंबक अशी अटक करण्यात आलेल्या आरोपींची नावे आहेत. हे सर्व आरोपी धारावी, मुंब्रा, सायन आणि ठाणे येथील रहिवासी आहेत.

आरोपींविरोधात विविध पोलीस ठाण्यात गुन्हे दाखल

आरोपींविरोधात मुंबईतील विविध पोलीस ठाण्यात चोरी, घरफोडी, जबरी चोरी आणि हत्येचा प्रयत्न असे एकूण 40 गुन्हे दाखल असल्याचे तपासात निष्पन्न झाले आहे.