NCB ची नालासोपाऱ्यात धडक कारवाई, कोकेन-मेफेड्रॉन जप्त, नायजेरियन नागरिकासह दोघे अटक

मुंबई : नार्कोटिक्स कंट्रोल ब्युरो मुंबई ड्रग्ज सप्लायर्स आणि पेडलर्सविरुद्ध सातत्याने लढा देत आहे. ठाणे आणि नालासोपारा भागात धडक कारवाई करत एनसीबीने कोकेन आणि मेफेड्रॉन ड्रग्जसाठा जप्त केला आहे. एका नायजेरियन नागरिकासह दोन आरोपींना अटक करण्यात आली आहे. (NCB seizes cocaine mephedrone drugs from Nalasopara Nigerian among two held)

मीरा रोडमध्ये कोकेन जप्त

गोपनीय माहितीच्या आधारे एनसीबी मुंबईच्या पथकाने मीरा रोड पोलिसांच्या मदतीने सफ्रान फारुक लकडावाला या भारतीय नागरिकाला ताब्यात घेतले. काशिमीरा नाका चौक, मीरा रोड पूर्व भागातून मंगळवारी त्याच्याकडून कोकेन ड्रग्ज जप्त केले. सफ्रानने दिलेल्या प्राथमिक माहितीच्या आधारावर एनसीबी मुंबईच्या पथकाने ब्लेसिंग एडविन ओकेरेके नावाच्या नायजेरियन नागरिकत्व असलेल्या आरोपीला ताब्यात घेतले. बुधवारी त्याच्याकडून नालासोपारा येथे मेफेड्रोन आणि कोकेन जप्त करण्यात आले.

आरोपींची मोडस ऑपरेंडी उघड

कारवाई दरम्यान एनसीबीने आरोपींची एक अनोखी मोडस ऑपरेंडी उघडकीस आणली. आरोपी सफ्रान फारुक लकडावाला हा कोकेन ड्रग्ज हवाई मार्ग आणि रस्ते मार्गाने भारताच्या विविध शहरांमध्ये पोहोचवण्याचं काम करत होता. तो दिल्ली आणि मुंबईहून विविध आफ्रिकन नागरिकांकडून ड्रग्जची खरेदी करत होता. त्यानंतर खरेदी केलेले ड्रग्ज तो भारतातील इतर राज्यात सप्लाय करत असल्याचे समोर आले आहे. एनसीबी मुंबईने या दोन्ही आरोपींच्या विरोधात गुन्हा दाखल केला असून पुढील तपास सुरु केला आहे.

संबंधित बातम्या:

खबऱ्याने माहिती दिली, कर्जत पोलिसांनी ट्रॅप लावला, दूध भेसळीची लाखो रुपयांची पावडर जप्त!

इराणी टॅल्कम पावडरचा कंटेनर उरणच्या बंदरावर उतरवला, कस्टमच्या धाडीनंतर धक्कादायक सत्य समोर

इराण ते उरण, समुद्राने 2,000 कोटींच्या हेरॉईनची तस्करी, टॅल्कम पावडरमध्ये लपवला ड्रग्जसाठा

(NCB seizes cocaine mephedrone drugs from Nalasopara Nigerian among two held)