वांद्रे येथे गोळीबार; गोळ्या झाडून हल्लेखोर फरार; एक गंभीर जखमी

मुंबई : मुंबई शहर व उपनगरांसह सर्वत्र गणपती विसर्जनाचा उत्साह ओसंडून वाहत आहे. अशातच मुंबईतील वांद्रेमध्ये गोळीबाराची घटना घडली आहे. या घटनेने परिसरात प्रचंड खळबळ उडाली आहे. हल्लेखोराने गोळीबार (Firing) करून पळ काढला असून त्याने केलेल्या गोळीबारात एक व्यक्ती जखमी (Injury) झाला आहे. हल्लेखोराला पकडण्यासाठी वांद्रे पोलिसांनी परिसरात नाकाबंदी (Blockade) केली आहे.

सगळीकडे गणपती विसर्जनासाठी गर्दी झाली असतानाच त्या गर्दीचा फायदा घेत हल्लेखोर पसार झाला आहे. त्यामुळे त्याला शोधण्याचे आव्हान पोलिसांपुढे आहे. पोलिसांनी या घटनेच्या वृत्ताला दुजोरा दिला आहे.

गोळीबारात जखमी झालेल्या व्यक्तीवर रुग्णालयात उपचार सुरू

अज्ञात हल्लेखोराने केलेल्या गोळीबारात एका व्यक्तीला गंभीर दुखापत झाली आहे. हल्लेखोराने पाठीमागून गोळी झाडल्याचे प्रत्यक्षदर्शींनी पोलिसांना सांगितले आहे. पिडीत व्यक्तीच्या पाठीला गंभीर दुखापत झाली असून जवळच्या रुग्णालयात दाखल करण्यात आले आहे.

हे सुद्धा वाचा

वांद्रे पूर्वेकडील निर्मल नगर पोलीस ठाण्याच्या हद्दीत सायंकाळच्या सुमारास ही घटना घडली आहे. याप्रकरणी अज्ञात हल्लेखोराविरूद्ध खुनाच्या प्रयत्नाचा गुन्हा दाखल करण्यात आला असून, त्याला पकडण्याचे प्रयत्न सुरू आहेत,” असे निर्मल नगर पोलिस ठाण्याच्या अधिकाऱ्यांनी सांगितले.

पूर्ववैमनस्यातून हल्ला केल्याचा संशय

या गोळीबाराच्या घटनेचे नेमके कारण अजून उघड झालेले नाही. पिडीत व्यक्तीचा जबाब नोंदवून घेण्यात आल्यानंतर काही धागेदोरे हाती लागू शकतील, असे पोलिसांचे म्हणणे आहे. हल्ला झालेल्या व्यक्तीची आधीपासून कुणाशी दुश्मनी आहे का, याचा तपास घेतला जात आहे.

ही घटना पूर्ववैमनस्यातून घडली असू शकते, असा प्राथमिक अंदाज पोलिसांनी वर्तवला आहे. दरम्यान, महिन्यापूर्वीही वांद्रे पश्चिमेकडील लिंक रोडवर गोळीबाराची घटना घडली होती. व्यावसायिक वादातून तो गोळीबार करण्यात आला होता.