Nagpur Crime : पत्नी नांदायला येत नाही म्हणून पित्याचे निर्दयी कृत्य, पोटच्या मुलांसोबत केले ‘हे’ कृत्य, मग…
अशोकचे त्याच्या पत्नीसोबत वाद होते. याच वादाला कंटाळून त्याची पत्नी मुलांसह वेगळी राहत होती. पत्नी नांदायला यायला तयार नव्हती. अखेर समझोत्यानुसार दोन्ही मुलं आठवड्यातून एकदा वडिलांना भेटायला जातील असे ठरले होते.
नागपूर : पती-पत्नीच्या वादात मुलं नेहमी भरडली जातात. मात्र आई-वडिलांमधील भांडण चक्क मुलांच्या जीवावरच बेतल्याची घटना नागपूरमध्ये उघडकीस आली आहे. पत्नी नांदायला येत नाही म्हणून पतीने आपल्या दोन मुलांना विष पाजून स्वतःही आत्महत्या केल्याची घटना वाठोडा पोलीस ठाण्याअंतर्गत घडली आहे. या घटनेत पित्यासह 7 वर्षाच्या मुलीचा मृत्यू झाला आहे तर 12 वर्षीय मुलावर रुग्णालयात आयसीयूमध्ये उपचार सुरु आहेत. अशोक बेले असे आरोपी पित्याचे नाव आहे. याप्रकरणी वाठोडा पोलीस ठाण्यात घटनेची नोंद करण्यात आला आहे. या घटनेमुळे परिसरात एकच खळबळ माजली आहे.
काय घडले नेमके?
नागपूर शहरातील वाठोडा पोलीस ठाण्याच्या हद्दीत असलेल्या वैष्णवदेवी नगर येथे अशोक बेले हा पत्नी प्रिया बेले आणि दोन मुलांसह राहत होता. बेले दाम्पत्याला 12 वर्षाचा मुलगा आणि 7 वर्षाची मुलगी होती.
पत्नी मुलांसह वेगळी राहत होती
अशोकचे त्याच्या पत्नीसोबत वाद होते. याच वादाला कंटाळून त्याची पत्नी मुलांसह वेगळी राहत होती. पत्नी नांदायला यायला तयार नव्हती. अखेर समझोत्यानुसार दोन्ही मुलं आठवड्यातून एकदा वडिलांना भेटायला जातील असे ठरले होते.
आजोबांनी मुलांना वडिलांना भेटायला नेले
ठरल्याप्रमाणे काल आजोबांनी दोन्ही मुलांना वडिलांकडे भेटायला सोडले आणि ते निघून गेले. आजोबा सोडून गेल्यानंतर अशोकने दोन्ही मुलांना विष पाजले, त्यानंतर स्वतःही गळफास घेत आत्महत्या केली.
आजोळचे लोक मुलांना घ्यायला आले असता घटना उघडकीस
मुलांना घेण्यासाठी जेव्हा पत्नीकडील व्यक्ती अशोकच्या घरी आले तेव्हा सर्व प्रकार उघडकीस आला. यानंतर दोन्ही मुलांना रुग्णालयात नेण्यात आले. मात्र दुर्दैवाने मुलीचा मृत्यू झाला होता, तर मुलावर आयसीयुत उपचार सुरु आहेत.
