Nagpur Crime : फसवणुकीसाठी सायबर गुन्हेगारांचा नवा फंडा, टॅक्सीचे बिल बाकी असल्याचे सांगत अकाऊंटवर डल्ला
नागरिकांना लुटण्यासाठी सायबर गुन्हेगार नानाविविध युक्त्या शोधून काढतात. नागपूरमध्ये आता फसवणुकीचा नवा फंडा चोरट्यांनी शोधून काढला आहे. नागरिकांनी थोडी सतर्कता दाखवल्यास अशी फसवणूक टाळता येईल.
नागपूर / 17 ऑगस्ट 2023 : पैसे लुटण्यासाठी हल्ली गुन्हेगार काय करतील याचा नेम नाही. सध्या ओला, उबेर टॅक्सीमधून प्रवास करणाऱ्या नागरिकांना लुटण्याचा नवा फंडा सायबर गुन्हेगारांचा सुरु आहे. भाडं चुकवल्यानंतरही काही भाडं शिल्लक असल्याचं सांगत पैसे पे करण्यासाठी लिंक पाठवतात. मग लिंकद्वारे पैसे लुटतात. सायबर पोलिसात अनेक तक्रारी दाखल झाल्या आहेत. पोलिसांनी नागरिकांना सतर्क राहण्याचे आवाहन केले आहे. सायबर पोलीस गुन्हेगारांचा शोध घेत आहेत. या घटनांमुळे प्रवाशांमध्ये भीतीचे वातावरण आहे. नागपुरमध्ये गुन्हेगारीमध्ये वाढ झाली आहे. हत्या, चोऱ्या, हल्ले आदि घटनांनी नागपूर हादरले आहे. वाढती गुन्हेगारी रोखण्याचे मोठे आव्हान पोलिसांसमोर आहे.
काय आहे मोडस ऑपरेंडी?
सायबर गुन्हेगार ओला, उबरने प्रवास करणाऱ्या प्रवाशांना टार्गेट करतात. ओला, उबेरने टॅक्सी बुक केल्यानंतर ग्राहक पैसे पे करतात. मात्र त्यानंतर सायबर गुन्हेगार प्रवाशांना फोन करुन काही भाडं शिल्लक असल्याचे सांगत पैसे न दिल्यास कोर्टात खेचण्याची धमकी देतात. घाबरलेले प्रवासी लगेच सायबर पोलिसांनी पाठवलेल्या लिंकवर क्लिक करुन पैसे भरतात. याचवेळी आरोपी त्यांच्या खाते साफ करतात.
गेल्या काही दिवसात अशा घटनांमध्ये मोठ्या प्रमाणात वाढ झाली आहे. सायबर पोलिसात अशा अनेक तक्रारी प्राप्त झाल्या आहेत. यानंतर पोलीस अॅक्शन मोडवर आले आहेत. पोलीस प्रकरणाचा गांभीर्याने तपास करत आरोपींचा शोध घेत आहेत. तसेच नागरिकांनाही अशा फसवणुकीपासून सावध राहण्याचे आवाहन केले आहे. नागरिकांनी थोडी जागरूकता बाळगली तरी अशी फसवणूक टाळता येऊ शकते.
