Nagpur Crime : बयो… चोर आहे की साप? बिअर शॉपच्या छोट्या काऊंटरमधून शिरला अन्…

नागपूरमध्ये गुन्हे दिवसेंदिवस वाढतच चालले असून आता चोरीचं एक असं प्रकरण समोर आलंय ज्यामुळे पोलिसही हैराण झालेत. खरंतर 6 जून रोजी नागपूरमधील एका बिअर शॉपमध्ये 25 हजार रुपयांची चोरी झाली. बिअर शॉपच्या काऊंटरला असलेले ग्रील न कापता आत घुसणं आणि चोरी करणं म्हणजे अश्कयचं होतं. पण तरीही चोर आत घुसला आणि कॅश काऊंटरमधील 25 हजार रुपये पळवले. अखेर याप्रकरणी गुन्हा दाखल करण्यात आल्यावर पोलिसांनी शॉपमधलं सीसीटीव्ही फूटेज हस्तगत केलं आणि ते तपासलं असता समोर जे दिसलं ते पाहून सर्वांचेच डोळे विस्फारले. पैशांसाठी त्या चोराने जे केलं त्याने सगळेच हैराण झाले. दुकांनातून बॉटल विक्री करणाऱ्या खिडकीतून चक्क आत घुसून चोरी करणरा भन्नाट सीसीटीव्ही फूटजे समोर आला असून अखेर त्या आरोपीला अटक करण्यात यश आले आहे. शेख राजा शेख बाबा असे अटकेतील आरोपीच नाव आहे.

लवचिक चोराचे कारनामे

व्हिडिओ समोर आला असून त्यामध्ये एक इसमा आधी शॉपची पाहणी करताना दिसला. काळ्या रंगाचे कपडे घातलेल्या तरुणाने दुकानाची नीट पाहणी केली. थोड्या काळाने तो पुन्हा सीसीटीव्हीमध्य दिसला. त्याने खालून थेट काऊंटरवर उडी मारली आणि एका अरुंद जागेतून बिअर शॉपमध्ये शिरला. ज्या जागेतून ग्राहक दारूचे पैसे देतात आणि बॉटल घेतात, चोर त्याच जागेतून लवचिकपणे आत घुसला. रबरसारखे शरीर वाकवून आत गेला. आणि काऊंटर बॉक्समधून पैसे चोरल्यानंतर तो त्याच अरुंद जागेतून बाहेर पडला.

इथे पहा व्हिडीओ 

आरोपीला अटक

चोरीच्या घटनेनंतर तक्रार नोंदवल्यावर गुन्हा दाखल करण्यात आला . पोलिसांनी तपास सुरू केला असता असं दिसून आलं की वाठोडा पोलिस स्टेशन हद्दीतील रामश्री बियर बारमध्ये शेख राजा शेख बाबा नावाच्या 20 वर्षीय चोराने ही चोरी केली होती. तांत्रिक तपासाच्या मदतीने पोलिस त्याच्यापर्यंत पोहोचले आणि बेड्या ठोकल्या. अखेर त्याने चोरीची कबुली तर दिलीच, पण त्याने अमरावती येथून काही दुचाकीही चोरल्या होत्या असेही तपासात आढळून आलं.नागपूर पोलिसांच्या क्राईम युनिट ४ पथकाने अटक केली आहे.

वाठोडा पोलिस स्टेशनचे इन्स्पेक्टर हरीश बोराडे म्हणाले की, ही चोरीची घटना 6 जून रोजी रात्री उशिरा घडली. बिअर शॉपमध्ये बसवलेल्या सीसीटीव्हीच्या मदतीने आम्ही 13 जून रोजीआरोपीला पकडले. आरोपी शेख राजा शेख बाबा हा मूळचा अमरावतीचा आहे. तो काही दिवसांपूर्वी त्याच्या कुटुंबासह नागपूरला आला होता. अरुंद ठिकाणी घुसून चोरी करण्यात हा चोर तज्ज्ञ आहे. घटनेचा सीसीटीव्ही व्हिडिओ समोर आल्यापासून तो शहरात चर्चेचा विषय बनला आहे.