ट्रक साईडला उभा करुन जेवायला चालला होता चालक, रस्त्यात अडवून तडीपार गुंडाने बेदम चोपले मग…

कल्याण / सुनील जाधव : कायदा आणि सुव्यवस्थेचा प्रश्न लक्षात घेता गंभीर गुन्हे दाखल असलेल्या अट्टल गुन्हेगारांना तडीपार केलं जातं. पण कल्याणमध्ये एक भलताच प्रकार समोर आला आहे. कल्याणच्या बाजारपेठ पोलिसांनी पाच महिन्यांआधी एका अट्टल गुन्हेगाराला दोन वर्षांसाठी तडीपार केलं होतं. मात्र हाच आरोपी पुन्हा एकदा नवीन गुन्हा करताना याच पोलीस स्टेशनच्या हद्दीत सापडला आहे. एका ट्रक चालकाला मारहाण करत त्याला लुटल्याची घटना उघडकीस आली आहे. पोलिसांनी गुंडाला अटक केली आहे. उमेर नविद शेख असे या तडीपार गुंडाचे नाव आहे.

ट्रक चालकाला लुटण्याचा प्रयत्न

कल्याण गोविंदवाडी रोडवर कोल्हापूरच्या दिशेकडून एक ट्रक येत होता. कल्याण बाजारपेठ परिसरात जेवण्यासाठी ट्रक उभा करुन चालक जात होता. यावेळी दोघांनी ट्रक ड्रायव्हरला अडवलं. त्याला धक्काबुक्की करत त्याचा मोबाईल आणि पैसे हिसकावले. ट्रक चालकाने आरडाओरडा केला असता, परिसरातील काही लोकांनी या दोघांपैकी एका आरोपीला पकडले.

नागरिकांच्या सतर्कतेमुळे एकाला पकडले

आरोपीला गोविंदवाडी रोडवर पेट्रोलिंग करत असलेले पोलीस हवालदार सचिन साळवी आणि पोलीस हवालदार प्रेम बागुल यांच्या ताब्यात दिले. तर त्याचा साथीदार अंधाराचा फायदा घेऊन पसार झाला. जहीर शेख असे फरार आरोपीचे नाव असून, पोलीस त्याचा शोध घेत आहेत.

पोलिसांच्या माहितीनुसार, दोन्ही आरोपी कल्याणातील चौधरी मोहल्ला, दुधनाका येथे राहतात. यामधील अटक असलेला आरोपी उमेर नविद शेख हा सराईत गुन्हेगार असून, त्याच्यावर कल्याण डोंबिवली परिसरात अनेक गुन्हे दाखल आहेत. बाजारपेठ पोलिसांनी त्याच्यावर पाच महिन्यांपूर्वी तडीपारची कारवाई करत, ठाणे जिल्ह्यातून त्याला तडीपारही केले होते.