चोर सोडून संन्याशाला फाशी… एक सारख्या नावामुळे पोलिसांनी केली नको ती घोडचूक
आपण निर्दोष असल्याचे पीडित इसम वारंवार पोलिसांना सांगत होता, पण पोलिस त्याचं काहीच ऐकायला तयार नव्हते. पोलिसांनी आपले काहीच ऐकले नाही आणि तुरुंगात पाठवल्याचा आरोप करत पीडित इसमाने पोलिस आयुक्तांकडे न्यायाची मागणी केली आहे.
कानपूर | 23 ऑक्टोबर 2023 : उत्तर प्रदेशच्या कानपूर (uttar pradesh) पोलिसांचा अजब कारभार सध्या चर्चेत आला आहे. आरोपी न सापडल्याने त्याच नावाच्या आणखी एका व्यक्तीला 10 दिवसांसाठी जेलमध्ये पाठवण्याची अजब कामगिरी पोलिसांनी केली आहे. आपलं ओळखपत्र दाखवत, तो माणूस आपण निर्दोष असल्याचं पोलिसांना बजावत होता पण पोलिसांनी त्याचं काहीएक ऐकलं नाही. धक्कादायक गोष्ट म्हणजे आरोपीच्या वडिलांचा मृत्यू झाला असून तो त्याच्या पत्नीचा छळ करत होता.
गुन्हेगारांना तुरुंगात पाठवण्याच्या सरकारच्या आदेशामुळे कानपूर पोलिसांवर मोठा दबाव असल्याचं दिसत आहे. कॉलम पूर्ण करण्यासाठी गुन्हेगारांची ओळख न पटवता पोलिस निरपराधांनाच तुरुंगात पाठवत आहेत. घाटमपूर कोतवाली पोलिसांनीही असेच काहीस करत मोठी चूक केली.
चोर सोडून संन्याशाला फाशी
2021 मध्ये कुष्मांडा नगर येथील रहिवासी प्रमोद कुमार याला पोलिसांनी शस्त्रास्त्र कायद्याखाली तुरुंगात पाठवले होते. जामीनावर सुटल्यानंतर प्रमोदकुमार संखवार हा आरोपी या खटल्यात समन्स बजावूनही न्यायालयात हजर होत नव्हता. दिवाणी न्यायाधीश कनिष्ठ विभागाने 24 ऑगस्ट 2023 रोजी प्रमोद कुमार (संखवार) विरुद्ध NBW (non-bailable warrant) जारी केले. त्यानंतर 12 सप्टेंबर 2023 रोजी इन्स्पेक्टर शुभम सिंह आणि हेड कॉन्स्टेबल राज किशोर यांनी प्रमोद कुमार संखवार याच्या जागी प्रमोद कुमार (साहू) याला पकडले. आणइ त्याला वॉरंटी देऊन तुरुंगात पाठवले. प्रमोद साहू हा बसंत विहार घाटमपूर येथील रहिवासी असून त्याच्या भावाचासह काम करतो.
तुम्ही समजता तो मी नाही
22 सप्टेंबर रोजी प्रमोद कुमार साहू याची जामीनावर सुटका झाली. तुरूंगातून बाहेर आल्यानंतर प्रमोद कुमार साहू याने कमिश्नरकडे जाऊन तक्रार नोंदवली. अटक करून पोलिस त्याला पोलिस स्टेशनमध्ये घेऊन आले. तुझं नाव प्रमोद कुमार आहे, तुझ्या वडिलांचा मृत्यू झाला आहे. शस्त्रास्त्र बाळगल्याप्रकरणी तुझ्याविरोधात गुन्हा दाखल करण्यात आला आहे. तसेच पत्नीला मारहाण केल्याचा आरोपही तुझ्यावर आहे. हे सगळं ऐकल्यावर मी ती व्यक्ती नाही, हे मी पोलिसांना पटवून देण्याचा प्रयत्न केला. माझे वडील जिवंत आहेत , माझी बायको माहेरी गेली आहे, याचे सगळे पुरावे मी त्यांना दिले. मी कधीच जेलमध्ये गेलो नाही, हे पटवून देण्याचाही मी खूप प्रयत्न केला, पण पोलिसांनी माझं काहीच ऐकलं नाही आणि मला तुरूंगात पाठवलं, असं फिर्यादीने नमूद केलं.
चौकशीचे आदेश
या संपूर्ण प्रकरणाची चौकशी करण्यात येणार असल्याचे कानपूरचे सह पोलीस आयुक्त आनंद प्रकाश तिवारी यांनी सांगितले. असा प्रकार पुन्हा घडू नये यासाठी योग्य ती कारवाई करण्यात येईल.
